સાબરમતી નદીમાં ડૂબતાં યુવકને બચાવવા જતાં કડી શહેરના 5 યુવક ડૂબ્યા, એકનું મોત
માણસા તાલુકાના જૈનતીર્થ મહુડી પાસેથી પસાર થતી સાબરમતી નદીમાં શનિવારે કડીથી કેટલાક યુવાનો શ્રાવણી અમાસે દર્શન કરી નદીમાં સ્નાન માટે આવ્યા હતા. આ યુવાનો પૈકી એક યુવક નદીમાં ડૂબતો જોઈ તેના ચાર-પાંચ મિત્રો તેને બચાવવા ઉતર્યા હતા. જેમાંથી કડી ભાઉપુરાના યુવકનું ડૂબી જતાં મોત નીપજ્યું હતું. આ ઘટનાની જાણ થતાં માણસા ફાયરબ્રિગેડની ટીમે તાત્કાલિક મહુડી પહોંચી મૃતકને બહાર લાવી તેના પરિવારજનોને જાણ કરી હતી.
શ્રાવણી અમાસે કડીથી કેટલાક યુવકો મહુડી ખાતે દર્શન કરવા તેમજ અહીંથી પસાર થતી સાબરમતી નદીમાં ન્હાવા માટે આવ્યા હતા. શનિવારે બપોરે આ યુવાનો નદીમાં નહાવા ગયા તે વખતે એક યુવકને પાણીમાં ડૂબતો જોઈ તેના ચાર-પાંચ મિત્રો બચાવવા માટે ગયા હતા. પરંતુ ડૂબનાર યુવક પાણીના પ્રવાહમાં થોડીક ઊંચી જગ્યાએ પહોંચી જતાં તે બચી ગયો હતો.
પરંતુ તેને બચાવવા માટે પડેલા પાંચ યુવકો પૈકી પ્રકાશભાઈ રાવળ નામનો 25 વર્ષીય યુવક ઊંડા ખાડામાં ગરકાવ થઈ ગયો હતો. આ વખતે અન્ય ચાર મિત્રો પણ ડૂબવા લાગ્યા હતા. પરંતુ બહાર કિનારે ઊભા રહેલા લોકોએ તમામ યુવકોને બહાર ખેંચી લાવ્યા હતા. પરંતુ પ્રકાશભાઈ નદીના ઊંડા પાણીમાં જતા રહેતા તેને બચાવી શકાયા ન હતા.