ઊંઝા અને લાંઘણજ પોલીસ સ્ટેશન વિસ્તારમાંથી અલગ-અલગ દરોડા દરમિયાન પકડાયેલા વિદેશી દારૂ અને બિયરના મોટા જથ્થાનો આજેઊંઝાના પાટણ રોડ પર જાહેર સ્થળે નાશ કરવામાં આવ્યો છે. કોર્ટના આદેશ બાદ પોલીસ અને વહીવટી તંત્રના ઉચ્ચ અધિકારીઓની હાજરીમાં આ સમગ્ર કામગીરી વિગતવાર પંચનામા સાથે પૂર્ણ કરવામાં આવી હતી.
ઊંઝાથી પાટણ જતા રોડ પર આવેલા હેલીપેડ વાળી જગ્યાએ આ કામગીરી હાથ ધરવામાં આવી હતી. પકડાયેલી વિદેશી દારૂની બોટલો તેમજ બિયરના ટીન ઉપર રોલર ફેરવીને તેનો નાશ કરવામાં આવ્યો હતો. ત્યારબાદ જેસીબી દ્વારા મોટો ખાડો ખોદીને કાચની બોટલોનો ભૂકો જમીનમાં દાટી દેવામાં આવ્યો હતો. જ્યારે દારૂના ખાલી ખોખાંનો સ્થળ પર જ નાશ કરાયો હતો.
પોલીસ પાસેથી મળતી માહિતી મુજબ, બંને પોલીસ સ્ટેશન વિસ્તારમાંથી કુલ ૫૫,૦૯૦ બોટલ પકડાઈ હતી. જેની કુલ કિંમત રૂ.૧,૭૦,૪૩,૬૦૭ થાય છે. ઊંઝા પોલીસ સ્ટેશન કુલ ૪૬,૨૫૬ બોટલ કિંમત રૂ.૧,૫૦,૭૫,૬૯૨ જ્યારે લાંઘણજ પોલીસ સ્ટેશન કુલ ૮,૮૩૪ બોટલ કિંમત ૧૯,૬૭,૯૧૫ રૂપિયા થાય છે. આ વિદેશી દારૂના જથ્થાનો નાશ એડી.જ્યુડી.મેજી. ઊંઝા કોર્ટ તથા નામદાર ચીફ જ્યુ.મેજી. કોર્ટ મહેસાણાના હુકમ અન્વયે કરવામાં આવ્યો હતો. ઊંઝાના પ્રાંત અધિકારી, નશાબંધી અધિકારી તેમજ ઊંઝા પીઆઈ જે.પી.સોલંકી અને લાંઘણજ પીઆઈ એ.એમ.ગેલોત સહિતના અધિકારીઓ ખાસ ઉપસ્થિત રહ્યા હતા.
