મહેસાણા જિલ્લામાં પશુ ચોરીની વધતી ઘટનાઓને ડામવા માટે લોકલ ક્રાઇમ બ્રાન્ચ (LCB)ને એક મોટી સફળતા હાથ લાગી છે. પોલીસ ટીમે ચોક્કસ બાતમીના આધારે પાલાવાસણા ચોકડી પાસે આવેલા પુલ નીચેથી પશુઓની ચોરી કરતી ગેંગના ત્રણ શખ્સોની ધરપકડ કરી છે. આ સઘન કાર્યવાહી દરમિયાન પોલીસે આરોપીઓ પાસેથી એક સફેદ સ્વિફ્ટ કાર, ચાર મોબાઈલ ફોન અને રોકડ રકમ મળીને કુલ રૂ. ૧,૩૯,૧૦૦ નો મુદ્દામાલ જપ્ત કરીને કાયદેસરની કાર્યવાહી હાથ ધરી છે.
ગાંધીનગર રેન્જના ડીઆઈજી વિરેન્દ્રસિંહ યાદવ અને મહેસાણાના એસપી હિમાંશુ સોલંકીની કડક સૂચના તેમજ પીઆઇ એ.એમ. કામળીયાના નેતૃત્વ હેઠળ એલસીબીએ આ ઓપરેશન પાર પાડ્યું હતું. હ્યુમન ઇન્ટેલિજન્સ અને ટેક્નિકલ સર્વેલન્સની મદદથી પોલીસે સલમાન ગુલામુસ્તુફા કુરેશી, મહોમંદઘોષ મહમંદહનીફ કુરેશી અને મહોમંદરફીક મુખત્યાર શેખ નામના ત્રણ ઈસમોને દબોચી લીધા હતા. પ્રાથમિક પૂછપરછમાં જ આ ત્રણેય શખ્સોએ પશુ ચોરીના ગુનામાં પોતાની સંડોવણી હોવાનો સ્પષ્ટ સ્વીકાર કર્યો હતો.
આ સમગ્ર પ્રકરણમાં આ ગુનાહિત પ્રવૃત્તિ સાથે સંકળાયેલા અન્ય બે આરોપીઓ હજુ પણ પોલીસ પકડથી દૂર (વોન્ટેડ) છે, જેમને ઝડપી પાડવા માટે તપાસના ચક્રો ગતિમાન કરવામાં આવ્યા છે. પકડાયેલા ત્રણેય આરોપીઓ સામે કાયદેસરની પ્રક્રિયા પૂર્ણ કરીને આગળની વધુ તપાસ અર્થે તેમને મહેસાણા તાલુકા પોલીસ મથકના હવાલે કરવામાં આવ્યા છે. આ સફળ કામગીરીથી ગુનેગારોમાં ફફડાટ વ્યાપી ગયો છે.
