ઊંઝા પોલીસ સ્ટેશન વિસ્તારમાંથી એક્ટિવા ચોરીની ઘટનામાં પોલીસે ગણતરીના કલાકોમાં જ સફળતા મેળવી છે. પોલીસે ચોરીના એક્ટિવા સાથે એક આરોપીને ઝડપી પાડી કાયદેસરની કાર્યવાહી હાથ ધરી છે. આ મામલે પોલીસ દ્વારા એક અન્ય આરોપીને પકડવાના ચક્રો ગતિમાન કરવામાં આવ્યા છે.
માહિતી મુજબ, ઉચ્ચ અધિકારીઓની સૂચનાને પગલે ઊંઝા પોલીસ સ્ટેશનનો સર્વેલન્સ સ્ટાફ વિસ્તારમાં પેટ્રોલીંગમાં હતો. આ દરમિયાન મળેલી ચોક્કસ બાતમીના આધારે પોલીસે જે.પી.ના વાડા પાસે મીઠાની ઘંટી નજીક વોચ ગોઠવી હતી. ત્યાંથી નંબર પ્લેટ વગરનું સફેદ કલરનું એક્ટિવા લઈને પસાર થતા એક શખ્સને પોલીસે અટકાવી પૂછપરછ કરી હતી. પોલીસની કડક પૂછપરછમાં આરોપીએ ચોરીની કબૂલાત કરી હતી. તેણે જણાવ્યું હતું કે, ગત 7 જુલાઈના રોજ ઊંઝાથી મહેસાણા હાઈવે પર આવેલા સુપથ્ય કોમ્પ્લેક્સના બેઝમેન્ટ પાર્કિંગમાંથી આ એક્ટિવા ચોર્યું હતું. પોલીસે એક્ટિવાના ચેસીસ અને એન્જિન નંબરના આધારે તપાસ કરતા તે ચોરીનું હોવાનું ફલિત થયું હતું. જે બાદ પોલીસે આરોપી સાહિલકુમાર સુરેશભાઈ પરમાર રહે.ઊંઝાની ધરપકડ કરી મુદ્દામાલ કબજે કર્યો હતો. આ ગુનામાં સંડોવાયેલા અન્ય એક આરોપી રાજેન્દ્રકુમાર ઉર્ફે કટાર અશોકભાઈ શ્રીમાળી રહે.ઊંઝાને પકડવા માટે પોલીસે શોધખોળ શરૂ કરી છે. સમગ્ર ઓપરેશનમાં ઊંઝા પીઆઈ જે.પી. સોલંકી અને તેમની ટીમના પોલીસ કર્મચારીઓએ મહત્વની ભૂમિકા ભજવી હતી.
