ટ્રક ચાલક નશાની હાલતમાં હોવાનું સામે આવતા પોલીસ ફરિયાદ નોંધાઈ
સિધ્ધપુર નજીક કાકોશી ચોકડી પાસે રવિવારે બપોરે એક ટ્રકે અર્ટીગા કારને ટક્કર મારતા આશરે અઢી લાખનું નુકસાન થયું હતું. તો અકસ્માત સજૅનાર ટ્રક ચાલક નશાની હાલતમાં જણાતા સિધ્ધપુર પોલીસ સ્ટેશનમાં ફરિયાદ નોંધાઈ હોવાનું જાણવા મળ્યું છે. બનાવની મળતી માહિતી મુજબ સુરતના ભટાર રોડ પર રહેતા કિર્તીકુમાર ડાહ્યાલાલ પટેલ પોતાના પરિવાર સાથે અંબાજી દર્શન કરીને પરત સુરત પોતાની અર્ટીગા ગાડી (GJ05JH9046) મા જઈ રહ્યા હતા ત્યારે સિધ્ધપુરના કાકોશી ચોકડી નજીક આનંદ હોટલ પાસેથી તેઓની કાર પસાર થઈ રહી હતી ત્યારે ટ્રક નંબર MH.04.MH 4968ના ચાલકે પૂરઝડપે અને ગફલતભરી રીતે ટ્રક હંકારી અર્ટીગાને ટક્કર મારી હતી.
આ અકસ્માતમાં અર્ટીગા ગાડીની મુખ્ય હેડલાઇટ, બોનેટ, બંને સાઈડના દરવાજા, કાચ અને પાછળની લાઇટને વ્યાપક નુકસાન થયું હતું. ફરિયાદ મુજબ, આશરે 2,50,000 નું નુકસાન થયું છે. સદનસીબે, ગાડીમાં સવાર પરિવારના કોઈ સભ્યને ઈજા થઈ ન હતી.ફરિયાદી કિર્તીકુમારના જણાવ્યા અનુસાર, અકસ્માત બાદ ટ્રક ચાલકે તેમની સાથે દાદાગીરી કરી હતી. ટ્રક ચાલક દારૂના નશામાં હોવાનું જણાતા તેની મેડિકલ તપાસણી કરાવવાની પણ માંગ કરવામાં આવી છે. સિધ્ધપુર પોલીસે આ મામલે ટ્રક ચાલક વિરુદ્ધ ગુનો નોંધી વધુ તપાસ હેડ કોન્સ્ટેબલ નિતીનકુમાર મફતલાલ દેસાઈને સોપવામાં આવી હોવાનું જાણવા મળ્યું છે.
