ડીસા તાલુકાના ઝાબડીયા ગામે સ્ટેટ મોનિટરિંગ સેલ (SMC)ની ટીમે અચાનક દરોડો પાડીને મોટા પાયે ચાલી રહેલા જુગારધામનો પર્દાફાશ કર્યો છે. સ્થાનિક પોલીસને અંધારામાં રાખીને કરવામાં આવેલી આ ત્રાટક કાર્યવાહીથી સમગ્ર બનાસકાંઠા જિલ્લાના પોલીસ બેડામાં ભારે ખળભળાટ મચી ગયો છે.
SMCની આ કડક કાર્યવાહીમાં રૂ. 1,46,100ની રોકડ રકમ, 15 ચાર-વ્હીલર ગાડીઓ, 6 મોટરસાયકલ અને ટ્રકની એક બેટરી સહિતનો કિંમતી સામાન કબજે કરવામાં આવ્યો છે. SMC દ્વારા કુલ રૂ. 60,26,600નો મોટો મુદ્દામાલ જપ્ત કરી આગળની તપાસ હાથ ધરવામાં આવી છે.
ડીસા રૂરલ પોલીસની નાક નીચે જ આટલું મોટું જુગારધામ ચાલતું હોવા છતાં સ્થાનિક પોલીસ તંત્ર સાવ અજાણ રહ્યું કે પછી આંખ આડા કાન કરતું હતું, તે અંગે હવે અનેક તર્ક-વિતર્ક સર્જાયા છે. સ્થાનિક પોલીસ ઊંઘતી રહી અને ગાંધીનગરથી SMCની ટીમે આવીને સફળ દરોડો પાડતા ડીસા રૂરલ પોલીસની નિષ્ક્રિયતા સામે ગંભીર સવાલો ઊભા થયા છે. હાલમાં આ મુદ્દો સમગ્ર બનાસકાંઠા જિલ્લામાં ભારે ચર્ચાનો વિષય બન્યો છે.
