સરદાર પટેલ એજ્યુકેશન ફાઉન્ડેશન સંચાલિત ડી.એન.પી. આર્ટ્સ એન્ડ કોમર્સ કોલેજ, ડીસા સંકુલમાં આવેલ સંસ્થા પરિવારની કોલેજો ડી.એન.પી. આર્ટ્સ એન્ડ કોમર્સ કોલેજ, શ્રીમતી ચંદનબેન એસ. એસ. શાહ બી.સી.એ. કોલેજ તથા શ્રી પરાગભાઈ ટી. પટેલ સાયન્સ કોલેજ તેમજ ઇન્ડિયન રેડ ક્રોસ સોસાયટી અને રોટરી ક્લબ, ડીસાના સંયુક્ત ઉપક્રમે કોલેજના પ્રથમ સેમેસ્ટરમાં પ્રવેશ મેળવેલ વિદ્યાર્થીઓ માટે આર્ટ્સ એન્ડ કોમર્સ કોલેજના આચાર્ય ડૉ. આરતીબેન પટેલના માર્ગદર્શન હેઠળ હેલ્થ એન્ડ હાઈજીન સેલના કન્વીનર ડૉ. સુનિતાબેન એલ. ઠક્કર દ્વારા થેલેસેમિયા સ્ક્રીનીંગ કેમ્પ -2026 નું આયોજન કરવામાં આવ્યું.
પ્રતિ વર્ષની જેમ ચાલુ શૈક્ષણિક વર્ષ 2026-27 દરમિયાન કોલેજમાં પ્રથમ સેમેસ્ટરમાં પ્રવેશ મેળવેલ વિદ્યાર્થીઓનું થેલેસેમિયા સ્ક્રીનીગ 100 ટકા થઈ શકે અને દરેક વિદ્યાર્થી આ કેમ્પમાં થેલેસેમિયા પરીક્ષણ માટે પોતાના બ્લડ સેમ્પલ આપી શકે તે હેતુથી સમગ્ર કેમ્પનું આયોજન બે તબક્કામાં કરવામાં આવેલ. જેમાં પ્રથમ તબક્કામાં તા. 22/09/2026 થી તા. 24/09/2026, મંગળવાર થી ગુરુવાર દરમિયાન વિદ્યાર્થીઓના કુલ 1727 બ્લડ સેમ્પલ એકત્રિત કરી ટેસ્ટીંગ માટે રેડ ક્રોસ સોસાયટી, અમદાવાદ ખાતે મોકલવામાં આવેલ. સ્ક્રીનીંગ કેમ્પમાં વિદ્યાર્થીઓને પ્રોત્સાહિત કરવા માટે સોસાયટી રેડ ક્રોસ સોસાયટી ડીસા તાલુકા બ્રાન્ચમાંથી પ્રમુખ નટુભાઈ પટેલ, મંત્રી વિનોદભાઈ પટેલ, દેવેન્દ્રભાઈ રાજપુત તથા રોટરી ક્લબ, ડીસામાંથી પ્રમુખ શશિનભાઈ મેવાડા, મંત્રી પરીનભાઈ પંડયા તેમજ અન્ય સાથી મિત્રો ઉપસ્થિત રહ્યા હતા. સમગ્ર પ્રોજેક્ટને સફળ બનાવવા માટે હેલ્થ એન્ડ હાઈજીન સેલના તમામ સભ્યો, બી.સી.એ. કોલેજના આચાર્ય હિતેશભાઈ મેઢ અને બી.એસસી.કોલેજના આચાર્ય ડૉ. ખુશ્બુબેન ઠક્કર, ત્રણેય કોલેજોના સમગ્ર સ્ટાફ મિત્રો તથા વિદ્યાર્થી સ્વયંસેવકોનો સાથ અને સહકાર મળી રહ્યો હતો.
