ડીવાયએસપી વી.બી.બારાડ દ્વારા અંબાજી અને અમીરગઢ બોર્ડર પર સુરક્ષાને લઈને બાજ નજર
ચૂંટણીના માહોલ વચ્ચે અંબાજી અને બનાસકાંઠાના સરહદી વિસ્તારોમાં લોખંડી સુરક્ષા વ્યવસ્થા ગોઠવવામાં આવી છે. ૨૬ એપ્રિલે યોજાનારી સ્થાનિક સ્વરાજ્યની ચૂંટણીને અનુલક્ષીને બનાસકાંઠા પોલીસ એક્શન મોડમાં આવી છે, જેના ભાગરૂપે રાજસ્થાનને જોડતી છાપરી બોર્ડરને સંપૂર્ણપણે સીલ કરી દેવામાં આવી છે. એસ.પી.પ્રશાંત સુમ્બેના આદેશથી સરહદી વિસ્તારોમાં પોલીસની 'બાજ નજર' ગોઠવવામાં આવી છે, જેથી ચૂંટણી પ્રક્રિયા દરમિયાન કોઈપણ અનિચ્છનીય ઘટનાને ટાળી શકાય અને સુરક્ષા જળવાઈ રહે.
બોર્ડર પર સુરક્ષાની કમાન ડીવાયએસપી વી.બી.બારાડ અને પીઆઈ ડી.આર.પારગીની ટીમ દ્વારા સંભાળવામાં આવી રહી છે. છાપરી અને અમીરગઢ બોર્ડર પર આવતા-જતા તમામ વાહનોનું સઘન ચેકિંગ હાથ ધરવામાં આવી રહ્યું છે, જેથી ગેરકાયદેસર દારૂ, શંકાસ્પદ રોકડ કે અસામાજિક તત્વો રાજ્યમાં પ્રવેશી ન શકે. પોલીસના સતત પેટ્રોલિંગ અને કડક કાર્યવાહીને પગલે ગુનેગારોમાં ફફડાટ વ્યાપી ગયો છે અને સમગ્ર સરહદો પર પોલીસનો ચુસ્ત બંદોબસ્ત તૈનાત કરી દેવાયો છે.
