બનાસકાંઠા જિલ્લા મેજિસ્ટ્રેટ દ્વારા જાહેર કરાયેલા જાહેરનામાનો ભંગ બદલ ડીસા શહેર દક્ષિણ પોલીસે 'ન્યુ ગ્રાન્ડ ફેમિલી સ્પા'ના સંચાલક સામે કાયદેસરની કાર્યવાહી હાથ ધરી છે.પોલીસ સૂત્રો પાસેથી મળતી માહિતી મુજબ, ડીસા શહેર દક્ષિણ પોલીસ મથકના કર્મચારીઓ પેટ્રોલીંગમાં હતા તે દરમિયાન બાતમીના આધારે પાલનપુર રોડ પર આવેલા ખત્રી કોમ્પ્લેક્સમાં રેઈડ કરી હતી. જિલ્લા મેજિસ્ટ્રેટના જાહેરનામા મુજબ, સ્પા/મસાજ પાર્લર ચલાવનારા સંચાલકોએ પોતાનું ડ્રાઇવિંગ લાયસન્સ, પાનકાર્ડ, આધારકાર્ડ અને ચૂંટણી કાર્ડ જેવી દસ્તાવેજી વિગતો તેમજ ત્યાં કામ કરતા કર્મચારીઓની તમામ વિગતો સંબંધિત પોલીસ સ્ટેશનમાં જમા કરાવવી ફરજિયાત છે.
જોકે પોલીસની તપાસ દરમિયાન 'ન્યુ ગ્રાન્ડ ફેમિલી સ્પા'ના સંચાલક હરીભાઈ પ્રતાપજી માળી (રહે. બજરંગનગર, કાંટ રોડ, ડીસા) આ પ્રકારના કોઈ પણ દસ્તાવેજો રજૂ કરી શક્યા ન હતા. જાહેરનામાનું ઉલ્લંઘન કરી પોલીસમાં જરૂરી વિગતો જમા ન કરાવનાર સંચાલક વિરુદ્ધ પોલીસે ભારતીય ન્યાય સંહિતા-૨૦૨૩ની કલમ ૨૨૩ મુજબ ગુનો નોંધી આગળની કાયદેસરની કાર્યવાહી હાથ ધરી છે.શહેરમાં અસામાજિક પ્રવૃત્તિઓ રોકવા અને સુરક્ષા વ્યવસ્થા જાળવવા માટે પોલીસ દ્વારા કરવામાં આવેલી આ આકસ્મિક કાર્યવાહીથી સ્પા સંચાલકોમાં ફફડાટ વ્યાપી ગયો છે.
