મહેસાણા શહેરના મોઢેરા રોડ પર આવેલા જાણીતા સૂર્યા કોમ્પલેક્ષમાં મોડી રાત્રે અચાનક આગ ફાટી નીકળતા વિસ્તારમાં ભયનો માહોલ ફેલાયો હતો. કોમ્પલેક્ષની ત્રણ અલગ-અલગ દુકાનોમાં આગ લાગતા ધુમાડાના ગોટેગોટા ઉડ્યા હતા.
ઘટનાની જાણ થતા જ મહેસાણા નગરપાલિકાની ફાયર ફાઈટરની ટીમ તાત્કાલિક ઘટનાસ્થળે દોડી ગઈ હતી. ફાયર કર્મીઓએ ભારે જહેમત બાદ પાણીનો મારો ચલાવી આગ પર સંપૂર્ણ કાબૂ મેળવ્યો હતો. પ્રાથમિક અંદાજ મુજબ, શોર્ટ સર્કિટના કારણે આગ લાગી હોવાનું મનાઈ રહ્યું છે. આગની આ ઘટનામાં દુકાનમાં રહેલો સરસામાન બળીને ખાખ થઈ ગયો છે, જોકે સદનસીબે કોઈ જાનહાનિના સમાચાર પ્રાપ્ત થયા નથી.
