હવામાન વિભાગની આગાહી વચ્ચે અંબાજી પંથકમાં વહેલી સવારથી ધીમીધારે વરસાદ શરૂ થતાં સમગ્ર વિસ્તારમાં વરસાદી માહોલ છવાયો હતો. વરસાદના કારણે નીચાણવાળા વિસ્તારોમાં પાણી ભરાઈ જતા લોકોને અને વાહનચાલકોને હાલાકીનો સામનો કરવો પડ્યો હતો.
અંબાજી પોલીસ સ્ટેશન સામેના હાઈવે પર વરસાદી પાણી ઘૂંટણસમા ભરાઈ જતા વાહનચાલકોને પાણીમાંથી પસાર થવાની ફરજ પડી હતી. થોડા વરસાદમાં જ આ માર્ગ પર પાણી ભરાઈ જવાની સમસ્યા સર્જાતી હોવાથી સ્થાનિકોમાં તંત્ર સામે રોષ જોવા મળી રહ્યો છે. અંબાજી સહિત આસપાસના વિસ્તારોમાં વરસાદના કારણે વાતાવરણમાં ઠંડક પ્રસરી હતી. જ્યારે અરવલ્લીની ગિરિમાળાઓમાં પણ મેઘરાજાની પધરામણી થતાં પ્રકૃતિ સોળે કળાએ ખીલી ઊઠી હતી. દાંતા અને હડાદ તાલુકામાં પણ વરસાદી માહોલ જોવા મળ્યો હતો.
સ્થાનિકોના જણાવ્યા મુજબ, અંબાજી પોલીસ સ્ટેશન સામેના રોડ પર વરસાદી પાણીના નિકાલની યોગ્ય વ્યવસ્થા ન હોવાથી સામાન્ય વરસાદમાં પણ પાણી ભરાઈ જાય છે. તંત્ર દ્વારા વરસાદી પાણીના નિકાલની કાયમી વ્યવસ્થા કરવામાં આવે તેવી માંગ ઉઠી છે.
