અરવલ્લી જિલ્લામાં વિવિધ પડતર માંગણીઓ અને પ્રશ્નોને લઈને મહેસૂલી કર્મચારીઓએ સરકાર સામે ઉગ્ર આંદોલનનો રસ્તો અપનાવ્યો છે. જિલ્લાના તલાટી કમ મંત્રીથી લઈને નાયબ મામલતદાર કક્ષા સુધીના અંદાજે 250 જેટલા મહેસૂલી કર્મચારીઓ અચોક્કસ મુદતની હડતાળ પર ઉતરી ગયા છે.
કર્મચારીઓની હડતાળના કારણે જિલ્લાની મામલતદાર કચેરીઓ, તાલુકા પંચાયતો અને ગ્રામ પંચાયતોમાં રોજિંદા વહીવટી અને નાગરિકોના કામો ઠપ થઈ ગયા છે. આવકનો દાખલો, જાતિ પ્રમાણપત્ર, જમીન રેકર્ડ તેમજ અન્ય સરકારી કામકાજ અટવાતા દૂર-દૂરથી આવતા અરજદારોને ભારે હાલાકીનો સામનો કરવો પડી રહ્યો છે. કર્મચારીઓએ તેમની ન્યાયી માંગણીઓ સત્વરે સ્વીકારવામાં નહીં આવે તો આંદોલન વધુ ઉગ્ર બનાવવાની ચીમકી ઉચ્ચારી છે.
