પુરવઠા ટીમની તપાસ અંતે આ સરકારી જથ્થો ન હોવાનું ખુલ્યું
હારિજ પોલીસને રોડા ગામ પાસે 74 કટ્ટા બાજરી ભરેલો ટેમ્પો શંકાસ્પદ લાગતાં અટકાવ્યો હતો. પોલીસ મથકે લાવી સરકારી અનાજ હોવાની આશંકાએ પુરવઠા વિભાગે તપાસ કરતાં જથ્થો ખેડૂતનો હોવાનું ખુલ્યું હતું.ત્યારબાદ પોલીસે કાર્યવાહી પૂર્ણ કરી ટ્રક અને અનાજ માલિકને પરત સોંપ્યું હતું.હારિજ પોલીસની ટીમે પેટ્રોલિંગ દરમિયાન રોડા ગામ નજીક શંકાસ્પદ હાલતમાં પસાર થઈ રહેલા બાજરી ભરેલા ટેમ્પાને અટકાવી તપાસ હાથ ધરી હતી. તપાસ દરમિયાન ટ્રક માંથી અંદાજે 74 કટ્ટા બાજરી મળી આવતાં અનાજના જથ્થા અંગે શંકા ઊભી થઈ હતી.જેના પગલે પોલીસે તાત્કાલિક પુરવઠા મામલતદાર ને ઘટના સ્થળે બોલાવી વધુ તપાસ કરાવી હતી.
પુરવઠા વિભાગે સ્થળ પર પહોંચી બાજરીના જથ્થાની ચકાસણી કરતાં આ અનાજ સરકારી કંટ્રોલ અથવા રેશનિંગનો ન હોવાનું સ્પષ્ટ થયું હતું. તપાસમાં માલૂમ પડ્યું કે બાજરીનો જથ્થો એક ખેડૂતનો હતો. અને વેચાણ માટે પેઢીમાં લઈ જવામાં આવી રહ્યો હતો.પુરવઠા વિભાગે લેખિત અહેવાલ આપ્યા બાદ પોલીસે કાયદેસરની પૂછપરછ કરી અને જરૂરી કાર્યવાહી પૂર્ણ કરી હતી. ત્યારબાદ બાજરીનો જથ્થો અને ટેમ્પાને તેના માલિકને પરત સોંપી રવાના કરવામાં આવ્યા હોવાનું પી.આઇ એ.જે મહેરીયા એ જણાવ્યું હતું.
