112 પર કોલ મળતા જ ફાયર ટીમ ઘટનાસ્થળે પહોંચી
ઊંઝાના મલ્લોત ચોક, જી.એલ. પટેલ હાઈસ્કૂલની સામે આવેલા ગામ-તળાવમાં એક ડેડબોડી તરતી દેખાઈ રહી છે. આ કોલ મળતાની સાથે જ ઊંઝા નગરપાલિકા ફાયર વિભાગની ટીમ તાબડતોડ માત્ર 8 મિનિટના સમયમાં ઘટનાસ્થળે દોડી પહોંચી હતી.
ઘટનાસ્થળે પહોંચેલી ફાયર ફાઈટરની ટીમે તુરંત જ રેસ્ક્યૂ કામગીરી હાથ ધરી હતી. તળાવના પાણીમાંથી મૃતદેહને બહાર કાઢવા માટે ફાયર વિભાગના જવાનોએ ભારે જહેમત ઉઠાવી હતી. આશરે 1 કલાકની સતત કામગીરી બાદ ટીમ દ્વારા ડેડબોડીને સુરક્ષિત રીતે બહાર કાઢી સ્થાનિક પોલીસને સોંપવામાં આવી હતી.
ફાયર ટીમની સરાહનીય કામગીરી
આ રેસ્ક્યૂ ઓપરેશનમાં ઉંઝા ફાયર વિભાગના જવાનો આકાશ યોગી, મન ધોબી અને દર્શન પ્રજાપતિએ હાજર રહીને ત્વરિત અને સરાહનીય કામગીરી કરી હતી. હાલ પોલીસે મૃતદેહનો કબજો મેળવી તેની ઓળખવિધિ તેમજ આગળની કાયદેસરની કાર્યવાહી હાથ ધરી છે.
