પાલિકાની ૧૪ બેઠકોમાંથી ૫ બેઠકો અપક્ષના ફાળે જ્યારે ૯ બેઠકો પર ભાજપનો વિજય
ઊંઝા તાલુકા પંચાયતની ૧૩ બેઠકો પર ચૂંટણીને લઈ ઉનાવા એચ.પી.હાઈસ્કુલ ખાતે મતગણતરી હાથ ધરાઈ હતી. ઉંઝા તાલુકા ભાજપ પ્રમુખ હર્ષદભાઈ પટેલ અને તેમની ટીમની અથાગ મહેનત રંગ લાવી હતી. તાલુકા પંચાયતની તમામ બેઠકો પર અને જીલ્લા પંચાયતની બે બેઠકો પર ભાજપનો ભગવો લહેરાયો છે જ્યારે કોંગ્રેસના સુપડા સાફ થઈ ગયા હતા.
ઊંઝા નગરપાલિકાની ૧૪ બેઠકો માટેની ચૂંટણીને લઈ રામબાગ સ્કૂલ ખાતે મતગતરી હાથ ધરાઈ હતી. જેમાં ૫ બેઠકો અપક્ષના ફાળે જતાં ૯ બેઠકો પર ભાજપનો ભગવો લહેરાયો છે. સવારથી પરિણામને લઈ મતગણતરી સ્થળ પર લોકોના ટોળે ટોળા એકઠા થવા પામ્યા હતા. વોર્ડ નં.૪ નું પરિણામ આવતા ભાજપ માટે આંચકો લાગ્યો હતો. ત્રણ બેઠક પર અપક્ષ જ્યારે એક બેઠક પર ભાજપ વિજય થયું હતું. વોર્ડ નં.૯ ના પરિણામમાં ત્રણ બેઠક પર ભાજપ અને એક બેઠક પર અપક્ષ વિજયી જાહેર થયા હતા. જોકે નગરપાલિકાની એક પણ બેઠક કોંગ્રેસના ફાળે જવા પામી નથી. વોર્ડ નં.૫ ના અલ્કેશ પટેલને સૌથી વધુ ૨૫૫૭ મત મળેલ છે.
