ડીસાના જુનાડીસા પાસે ટ્રેનની અડફેટે યુવકનું કમકમાટીભર્યું મોત

પોલીસ દ્વારા યુવકની ઓળખવિધિની તજવીજ બનાસકાંઠા જિલ્લાના ડીસા તાલુકાના જુનાડીસા ગામ નજીક એક હૃદયદ્રાવક ઘટના સામે આવી છે. મોડી રાત્રે રેલવે ટ્રેક પર ટ્રેનની અડફેટે આવતા એક અજાણ્યા યુવકનું ઘટના સ્થળે જ કમકમાટીભર્યું મોત નીપજ્યું છે. આ ઘટનાને પગલે પંથકમાં અરેરાટી પ્રસરી ગઈ છે. ​​મળતી માહિતી મુજબ, ગત મોડી રાત્રિના સમયે જુનાડીસા પાસેથી પસાર થતી રેલવે લાઇન પર એક યુવક કોઈ કારણસર ટ્રેનની અડફેટે આવી ગયો હતો. ટ્રેનની ટક્કર એટલી ભયાનક હતી કે યુવકનું સ્થળ પર જ મોત થયું હતું. વહેલી સવારે સ્થાનિક લોકોએ ટ્રેક પર મૃતદેહ જોતા તાત્કાલીક પોલીસને જાણ કરતા ​ડીસા રૂરલ પોલીસનો કાફલો ઘટનાસ્થળે દોડી આવ્યો હતો. પોલીસે મૃતદેહનો કબજો મેળવી પંચનામું કરી પીએમ અર્થે ખસેડવાની તજવીજ હાથ ધરી છે. ​જોકે મરણ જનાર યુવક કોણ છે અને કયા સંજોગોમાં ટ્રેન નીચે આવ્યો ? તે અંગે પોલીસ તપાસ કરી રહી છે.હાલમાં મૃતકની ઓળખ કરવાની કાર્યવાહી ચાલુ છે. આ અકસ્માતને પગલે રેલવે ટ્રેક આસપાસ લોકોના ટોળેટોળા ઉમટી પડ્યા હતા. ડીસા રૂરલ પોલીસે આ મામલે અકસ્માતે મોતનો ગુનો નોંધી વધુ તપાસ શરૂ કરી છે.