ભાભર ખાતે જાહેરમાં ગંદકી કરતા અને અખાદ્ય પદાર્થનું વેચાણ કરતા વેપારીઓ દંડાયા

સેનેટરી રાઉન્ડમાં યુનિટો સામે દંડકીય કાર્યવાહી; ભાભર શહેર ખાતે પાલિકા, આરોગ્ય ટીમ અને પોલીસના સંકલનથી મુખ્ય જિલ્લા આરોગ્ય અધિકારીની સુચનાથી સેનેટરી રાઉન્ડ યોજવામાં આવ્યો હતો. જેમાં શહેરમાં નાસ્તા હાઉસ, ફ્રુટ, શાકભાજી અને મીઠાઈ ફરસાણની દુકાનોના વેપારીઓના યુનિટે રૂબરૂ જઈ આરોગ્ય વિશે માહિતી આપી હતી જેમ કે એક્સપાયર ડેટ વાળી વસ્તુઓનુ વેચાણ કરવું નહીં, રોજેરોજનો ખોરાક તાજો બનાવવો, ખાધ વસ્તુઓને ઢાંકીને રાખવી, સ્વચ્છ પાણીનો ઉપયોગ કરવો અને વેચાણ કરતા સ્ટાફની વ્યક્તિગત સ્વચ્છતા જાળવવી તેમજ જાહેર જનતાનું આરોગ્ય જળવાઈ રહે તે માટે વેપારીઓને સુચનાઓ આપી હતી. ચોમાસું સિઝન હોઈ ભાભર શહેરમાં બે તપાસ ટીમો દ્વારા ૪૫ યુનિટોની તપાસ કરતા ૪૫ કિલો અખાધ વસ્તુઓનો નાશ કર્યો હતો. જેમાં જાહેરમાં ગંદકી કરતા અને અખાદ્ય પદાર્થનું વેચાણ કરતા ૩૧ યુનિટો સામે કાર્યવાહી કરી કુલ રૂ.૫૨૦૦ નો વહિવટી ચાર્જ પણ વસૂલ કરવામાં આવ્યો હતો.