વાવ થરાદ જિલ્લાના સુઈગામ પોલીસ સ્ટેશન વિસ્તારમાં એક યુવકના અપહરણની ચોંકાવનારી ઘટના સામે આવી છે. પ્રેમ સંબંધની અદાવત રાખીને ત્રણ શખ્સોએ ફિલ્મી ઢબે યુવકનું રસ્તામાં આંતરીને અપહરણ કર્યું હોવાની ફરિયાદ પોલીસ ચોપડે નોંધાઈ છે. મળતી માહિતી અનુસાર ફરિયાદી લાલજીભાઈ કલાભાઈ આસલ રહે. ખડોલ, તા.સુઈગામના જણાવ્યા અનુસાર, તેમનો દીકરો હિતેશભાઈ તેના મિત્ર હિતેશભાઈ પટેલ સાથે તા.૨૯/૦૪/૨૦૨૬ ના સવારે એક્ટિવા લઈને ભાભર તરફ જઈ રહ્યા હતો. તે દરમિયાન એટા ચોકડી પાસે એક સિલ્વર કલરની બલેનો ગાડી જીજે.06.પીકે. 6880 માં આવેલા ત્રણ શખ્સોએ તેમનો રસ્તો રોક્યો હતો.આ શખ્સોએ હિતેશને બળજબરીપૂર્વક ગાડીમાં બેસાડી દીધો હતો. અને તેના મિત્રને જાનથી મારી નાખવાની ધમકી આપી ત્યાંથી ફરાર થઈ ગયા હતા.જે બાબતને લઈને ફરિયાદના જણાવ્યા મુજબ, હિતેશને ગામના જ એક પરિવારની દીકરી સાથે પ્રેમ સંબંધ હતો.જેને લઈને અગાઉ આ બાબતે સામાજિક રીતે સમાધાન પણ થઈ ગયું હતું. તેમ છતાં સામા પક્ષે મનમાં વેરઝેર રાખીને આ પૂર્વ આયોજિત કાવતરું ઘડી અપહરણને અંજામ આપ્યો હતો.
જેમાં ૧ જગદીશભાઈ ધર્મશીભાઈ સોલંકી રહે.ઝઝામ, તા. સાંતલપુર ૨. પીયૂષભાઈ પથુભાઈ પારેગી રહે. મોરવાડા, તા.સુઈગામ ૩ પ્રવિણભાઈ કરશનભાઈ પારેગી રહે.મોરવાડા, તા. સુઈગામ વિરુદ્ધ સુઈગામ પોલીસે આ મામલે બીએનએસએસની કલમ ૧૪૦(૩), ૬૧, ૩૫૧(૨) અને ૫૪ મુજબ ગુનો દાખલ નોંધી આ કેસની આગળની વધુ તપાસ પોલીસ ઇન્સ્પેક્ટર એચ.એમ.પટેલ ચલાવી રહ્યા છે. જોકે સોશિયલ મીડિયા પર વાયરલ થયેલા વિડિયોના આધારે પણ પોલીસે પુરાવા એકત્ર કરવાની તજવીજ હાથ ધરી છે. અપહરણના આ ગંભીર બનાવને લઈ સરહદી પંથકમાં ભારે ચકચાર મચી જવા પામી છે.
