રોડ ઊંચો બનાવાયો, પરંતુ નાના ભૂંગળા નાખતાં વરસાદી અને ગટરના પાણીના નિકાલનો પ્રશ્ન રોજીંદો બન્યો
ડીસા તાલુકાના ઝેરડા ગામમાં તાજેતરમાં બનાવવામાં આવેલા રોડના કામમાં યોગ્ય આયોજનના અભાવે ગ્રામજનોને ભારે હાલાકીનો સામનો કરવો પડી રહ્યો છે. રોડને ઊંચો બનાવવામાં આવ્યો હોવા છતાં વરસાદી પાણી અને ગટરના પાણીના નિકાલ માટે પૂરતી ક્ષમતાવાળા ભૂંગળા ન નાખવામાં આવતાં સામાન્ય વરસાદમાં પણ ગટર ભરાઈ જાય છે અને ગંદુ પાણી રોડ પર ઉભરાઈ આવે છે.
ગામલોકોના જણાવ્યા મુજબ, રોડની બંને બાજુના વિસ્તારોમાં પાણીનો યોગ્ય નિકાલ ન થવાને કારણે ગટરના પાણી ભરાઈ રહે છે. જેના કારણે રાહદારીઓ, વાહન ચાલકો તેમજ આસપાસના રહેવાસીઓને ભારે મુશ્કેલીનો સામનો કરવો પડે છે. વરસાદી માહોલમાં તો સ્થિતિ વધુ ગંભીર બની જાય છે અને રોડ પર પાણી ભરાઈ જતાં અકસ્માતનો ભય પણ રહે છે. સ્થાનિકોમાં એવી પણ ચર્ચા છે કે રોડના નિર્માણ સમયે વરસાદી પાણીના નિકાલ અને ગટર વ્યવસ્થાને ધ્યાનમાં લેવામાં આવી હોત તો આજે આ સમસ્યા સર્જાઈ ન હોત ? હાલ ગામમાં ગટર ઉભરાવાનો પ્રશ્ન રોજીંદો બની ગયો છે. ગામલોકોએ સંબંધિત તંત્રને સ્થળ પર તપાસ કરી યોગ્ય કદના ભૂંગળા નાખી વરસાદી અને ગટરના પાણીના કાયમી નિકાલ માટે તાત્કાલિક કાર્યવાહી કરવાની માંગ કરી છે, જેથી ગ્રામજનોને આ સમસ્યામાંથી કાયમી રાહત મળી શકે.
