ડીસા GIDC વિસ્તારમાં આજે સાંજે એક ભંગારના ગોડાઉનમાં અચાનક આગ લાગતા અફરાતફરીનો માહોલ સર્જાયો હતો. ગોડાઉનમાં રહેલા જ્વલનશીલ કચરા અને અન્ય સામાનને કારણે આગે થોડી જ વારમાં વિકરાળ સ્વરૂપ ધારણ કર્યું હતું અને આકાશમાં કાળા ડિબાંગ ધુમાડાના ગોટેગોટા જોવા મળ્યા હતા.ઘટનાની જાણ થતા જ ડીસા નગરપાલિકાનો ફાયર વિભાગ તાત્કાલિક ઘટનાસ્થળે દોડી આવ્યો હતો. ફાયર ફાઈટરોએ ભારે જહેમત ઉઠાવીને આગને વધુ ફેલાતી અટકાવી હતી અને થોડા જ સમયમાં આગ પર કાબૂ મેળવી લીધો હતો. સદનસીબે, આ ઘટનામાં કોઈ જાનહાનિના સમાચાર નથી.
ભૂતકાળની ગોઝારી ઘટનાની યાદો તાજી થઈ ઉલ્લેખનીય છે કે, ભૂતકાળમાં ડીસામાં ફટાકડાના ગોડાઉનમાં લાગેલી ભીષણ આગમાં 22 જેટલા લોકોએ પોતાના જીવ ગુમાવ્યા હતા. તે હૃદયદ્રાવક ઘટનાની યાદો આજે પણ લોકોના મનમાં તાજી છે. ત્યારે, GIDC જેવા ઔદ્યોગિક વિસ્તારમાં ફરી આગ લાગવાની ઘટનાએ સુરક્ષા વ્યવસ્થા સામે ગંભીર સવાલો ઉભા કર્યા છે.તંત્ર દ્વારા આગ લાગવાનું ચોક્કસ કારણ જાણવા તપાસ હાથ ધરવામાં આવી છે, પરંતુ લોકોમાં વારંવાર બનતી આવી આગની ઘટનાઓને રોકવા માટે કડક ફાયર સેફ્ટીના નિયમોના પાલન અને યોગ્ય તપાસની માંગ ઉઠી છે.
