આગ પ્રસરતા અંબા મહેલ ફિલ્મ સિટીનો કેટલોક ભાગ બળીને ખાખ
દાંતાના દરબાર ગઢમાં આવેલા પૌરાણિક અંબે માતાના મંદિરની છત પર મોડી રાત્રે અંદાજે બે વાગ્યે આગ લાગી હતી. આગની વિકરાળ જ્વાળાઓ ઝડપથી પ્રસરી હતી.આ આગ મંદિર પરિસરમાં આવેલ ફિલ્મ સિટી 'અંબા મહેલ' સુધી પહોંચી હતી.જેમાં ફિલ્મસિટીનો કેટલોક ભાગ પણ આગની ઝપેટમાં આવી ગયા હતા, જેમાં એક ઓરડો બળીને ખાખ થઈ ગયો હતો.
દાંતામાં ફાયર ફાઈટરની સુવિધાના અભાવને કારણે વિકરાળ આગ વધુ પ્રસરી હતી. અંબાજીથી મંદિર ટ્રસ્ટના ફાયર બ્રિગેડની ગાડી રાત્રે અંબાજીથી દાંતા પહોંચી હતી અને પાણીનો મારો ચલાવી આગને કાબૂમાં લેવાના પ્રયાસો કર્યા હતા.
સ્થાનિક લોકોએ પણ આગ જોઈને તાત્કાલિક મદદ માટે દોડી આવ્યા હતા અને પાણી છાંટીને આગ બુઝાવવામાં મદદ કરી હતી. ઘટનાની જાણ થતાં પોલીસ પણ સ્થળ પર પહોંચી હતી અને પરિસ્થિતિની સમીક્ષા કરી હતી. સદનસીબે, આ ઘટનામાં કોઈ મોટી જાનહાનિ ટળી હતી. પ્રાયમરી ધોરણે આ આગ શોર્ટ સર્કિટના કારણે લાગી હોવાનું મનાઈ રહ્યું છે.
