ભાભર -ખડોસણ વચ્ચે રેલ્વે ક્રોસિંગ અંડર ગ્રાઉન્ડ ગરનાળામાં પાણી ભરાઈ રહેતા ખેડૂતોને હાલાકી

દર ચોમાસામાં વરસાદનું પાણી ભરાઈ જતા ખેડૂતોને પસાર થવું પણ મુશ્કેલ; ભાભરમાં રેલ્વે તંત્રની બેદરકારીથી ખેડૂતો ભારે હાલાકીનો સામનો કરી રહ્યા હોવાની ફરીયાદો ઉઠી રહી છે. ભાભરમાંથી પસાર થતી રેલ્વે લાઈનના ભાભર -ખડોસણ ગામને જોડતા રસ્તા ઉપરથી પસાર થતાં રેલ્વે પાટાના ક્રોસિંગ માટે રેલ્વે દ્વારા અંડર ગ્રાઉન્ડ ગરનાળું બનાવ્યું છે. આ વિસ્તારમાં આજુબાજુ ખેતરોમાં રહેતા ખેડૂતો ગરનાળામાંથી અવરજવર કરે છે પરંતુ થોડોક પણ વરસાદ પડે અને અંડર ગ્રાઉન્ડ ગરનાળું પાણીથી ભરાઈ જાય છે. જેના કારણે ચોમાસા દરમિયાન ખેડૂતો માટે રેલ્વે ક્રોસિંગ કરવું માથાના દુખાવા સમાન બની જાય છે. ખેડૂતોની માંગ છે કે રેલ્વે તંત્ર દ્વારા અંડર ગ્રાઉન્ડ ગરનાળામાંથી વરસાદી પાણી નિકાલ માટે કોઈક કાયમી વ્યવસ્થા ઊભી કરવામાં આવે તે જરૂરી છે.