ડીસા નગરપાલિકા દ્વારા શહેરમાં વિકાસના નામે શહેરના મુખ્ય રસ્તાઓ પર પીવાના પાણીની પાઇપલાઇન, સ્ટોર્મ વોટર લાઇન અને ભૂગર્ભ ગટરની લાઇનો નાખવા માટે મોટા પાયે ખોદકામ તો કરી દેવાયું, પરંતુ યોગ્ય પુરાણ ન કરાતાં હવે સમગ્ર શહેરના રસ્તાઓ મસમોટા ભૂવામાં ફેરવાઈ ગયા છે.આજે પડેલા માત્ર નજીવા વરસાદમાં પણ માર્ગો પર પડેલા ખાડાઓ પુરવા ગયેલું ડમ્પર પોતે જ એક વિશાળ ખાડામાં ખૂંપી ગયું હતું. ડમ્પર ફસાઈ જતાં વાહનવ્યવહાર ઠપ થઈ ગયો હતો અને સ્થાનિકો તથા વાહનચાલકોને ભારે હાલાકી ભોગવવી પડી હતી. આખરે મહા મુસીબતે જેસીબી મશીન બોલાવીને ડમ્પરને બહાર કાઢવામાં આવ્યું હતું.
નોંધનીય છે કે, અગાઉ ચોમાસાના પ્રથમ વરસાદમાં જ પાલિકાની કચાસ ખુલ્લી પડી ગઈ હતી અને શહેરના અલગ-અલગ વિસ્તારોમાં ૧૫થી વધુ વાહનો આ રીતે ખોદાયેલા ખાડાઓ અને ભૂવામાં ફસાયા હતા. તેમ છતાં પાલિકા તંત્ર દ્વારા કોઈ નક્કર કામગીરી ન કરાતાં પ્રજાના જીવ જોખમમાં મુકાયા છે. શહેરના મુખ્ય માર્ગો પર પડેલા જોખમી ભૂવાઓ અને ખાડાઓના કારણે અકસ્માતનો સતત ભય રહે છે. પાલિકાની આવી ઘોર બેદરકારી સામે સ્થાનિક રહીશોમાં ભારે રોષ જોવા મળી રહ્યો છે અને તાત્કાલિક ધોરણે તમામ રસ્તાઓનું યોગ્ય અને મજબૂત પુરાણ કરવામાં આવે તેવી લોકમાગ ઉઠી છે.
