વિકાસ કાર્યોને મળી બહુમતીથી મંજૂરી
માર્ચ ૨૦૨૬માં યોજાયેલી ડીસા નગરપાલિકાની ચૂંટણી બાદ અસ્તિત્વમાં આવેલી નવીન બોડીની પ્રથમ સાધારણ સભા આજે પાલિકાના સભાખંડમાં ઉત્સાહભર્યા વાતાવરણમાં યોજાઈ હતી. પાલિકા પ્રમુખ શ્રી કૌશિકભાઈ સાધુના અધ્યક્ષસ્થાને મળેલી આ પ્રથમ સભામાં આગામી સમયમાં થનારા વિકાસના વિવિધ કાર્યોને બહુમતીથી મંજૂરી આપવામાં આવી હતી. કોઈ પણ પ્રકારના વિવાદ વિના એકદમ ટૂંકા ગાળામાં સભાની કાર્યવાહી શાંતિપૂર્ણ રીતે પૂર્ણ થઈ ગઈ હતી.
૪૪માંથી ૩૭ સભ્યોની જંગી બહુમતી ધરાવતી ડીસા નગરપાલિકાની આ સભામાં અધ્યક્ષસ્થાનેથી એક પછી એક વિકાસલક્ષી એજન્ડા રજૂ કરવામાં આવ્યા હતા. ઉપસ્થિત તમામ સદસ્યોએ શહેરના હિતમાં એકસૂરે આ એજન્ડાઓને બહુમતીથી પસાર કરી દીધા હતા. કોઈ પણ વિરોધ કે વિવાદ વિના તમામ કામો મંજૂર થઈ જતાં ગણતરીની મિનિટોમાં જ સભાની કાર્યવાહી આટોપી લેવાઈ હતી સાધારણ સભા પૂર્ણ થયા બાદ મીડિયા સાથેની વાતચીતમાં પાલિકા પ્રમુખ કૌશિકભાઈ સાધુએ જણાવ્યું હતું કે, નવીન બોડી ડીસા શહેરના સર્વાંગી વિકાસ માટે કટિબદ્ધ છે. આજની પ્રથમ સભામાં જ તમામ સદસ્યોના સહયોગથી વિકાસ કાર્યોને બહુમતીથી બહાલી મળી છે, જે આગામી સમયમાં ડીસા શહેરના વિકાસને નવી ગતિ આપશે.
