ધાનેરા: નેનાવા માર્કેટ યાર્ડમાં ભારે પવનથી પતરા ઉડ્યા સદનસીબે જાનહાનિ ટળી

ગુજરાત-રાજસ્થાન સરહદ: ધાનેરાના નેનાવા બોર્ડર પાસે આવેલા બનાસ કૃષિ માર્કેટ યાર્ડમાં આજે બપોરે ભારે પવન અને ધમાકેદાર વરસાદને કારણે મોટું નુકસાન થયું છે. માર્કેટ યાર્ડમાં બનાવેલા શેડના મોટાભાગના પતરા જોરદાર પવનના કારણે ઉડી ગયા હતા. પ્રાથમિક અહેવાલ મુજબ, આ ઘટના આજે બપોરના સમયે બની હતી જ્યારે વિસ્તારમાં ભારે વરસાદ સાથે તીવ્ર પવન ફૂંકાયો હતો. પવન એટલો પ્રચંડ હતો કે શેડ પર લગાવેલા પતરા ઉખડી ગયા અને દૂર સુધી ફંગોળાયા હતા, જેના કારણે માર્કેટ યાર્ડમાં મોટું નુકસાન થયું છે. જોકે, સદનસીબે આ ઘટનામાં કોઈ જાનહાનિ થઈ નથી. આ કૃષિ માર્કેટ યાર્ડ ગુજરાત અને રાજસ્થાનની સરહદ પર આવેલું હોવાથી બંને રાજ્યોના ખેડૂતો માટે તે એક મહત્વનું કેન્દ્ર છે. પતરા ઉડી જવાના કારણે વેપારીઓ અને ખેડૂતોના માલસામાનને પણ નુકસાન થવાની શક્યતા છે. માર્કેટ યાર્ડના અધિકારીઓએ નુકસાનીનો અંદાજ કાઢવા માટે કાર્યવાહી શરૂ કરી છે. આ ઘટના બાદ વાતાવરણ થોડું શાંત થતાં જ સમારકામની કામગીરી શરૂ કરવામાં આવશે તેવી શક્યતા છે.