બનાસકાંઠા જિલ્લા એસીબી ટીમનું સફળ ઓપરેશન
બનાસકાંઠા જિલ્લાના ડીસા રેલવે સ્ટેશનની બુકિંગ ઓફિસમાં તત્કાલ ટિકિટના રિઝર્વેશન માટે લાંચ માગવાનો મામલો સામે આવતા બનાસકાંઠા એસીબીએ છટકું ગોઠવી રેલવેના ચીફ બુકિંગ ક્લાર્કને રૂ.૫૦૦ ની લાંચ લેતા રંગેહાથ ઝડપી પાડ્યો હતો.
મળતી વિગતો મુજબ, એક જાગૃત નાગરિક દિલ્હી જવાની તત્કાલ ટિકિટનું રિઝર્વેશન કરાવવા ડીસા રેલવે સ્ટેશન ગયા હતા. આ દરમિયાન સુરેશકુમાર રામુજી સોલંકી (ચીફ બુકિંગ ક્લાર્ક વર્ગ-3, ડીસા રેલવે સ્ટેશન) એ તત્કાલ રિઝર્વેશન કરવાના બદલામાં ફરિયાદી પાસે રૂ.૫૦૦ ની લાંચની માંગણી કરી હોવાનો આક્ષેપ છે.લાંચ આપવી ન પડે તે માટે ફરિયાદીએ એસીબીના ટોલ ફ્રી નંબર ૧૦૬૪ પર સંપર્ક કરી બનાસકાંઠા એસીબી પોલીસ સ્ટેશન, પાલનપુર ખાતે ફરિયાદ નોંધાવી હતી.જે ફરિયાદના આધારે એસીબીએ લાંચનું છટકું ગોઠવ્યું હતું .
છટકા દરમિયાન આરોપીએ ફરિયાદી પાસેથી રૂ.૫૦૦ ની લાંચની માંગણી કરી સ્વીકારી લેતા જ એસીબીની ટીમે તેને સ્થળ પર જ ઝડપી પાડ્યો હતો. આરોપી પાસેથી લાંચની રૂ.૫૦૦ ની રકમ રિકવર કરવામાં આવી હતી. સમગ્ર કાર્યવાહી ડીસા રેલવે સ્ટેશનની બુકિંગ ઓફિસ ખાતે કરવામાં આવી હતી.ટ્રેપનું ઓપરેશન બનાસકાંઠા એસીબી પોલીસ સ્ટેશનના પોલીસ ઇન્સ્પેક્ટર એલ.એસ. ચૌધરી તથા સ્ટાફ દ્વારા હાથ ધરવામાં આવ્યું હતું.
