બે યુવતી સહિત 6 સામે ગુનો નોંધાયો
બનાસકાંઠા જિલ્લાના ડીસા તાલુકાના એક ખેડૂતને હની ટ્રેપમાં ફસાવી તેના અપહરણ બાદ રૂ. 5 લાખની ખંડણી માંગવાના ગંભીર આરોપ સાથે ગઢ પોલીસ મથકે ફરિયાદ નોંધાઈ છે. ઘટનાને લઈને પોલીસે બે યુવતીઓ અને ચાર યુવકો સહિત કુલ 6 આરોપીઓ સામે ગુનો નોંધી વધુ તપાસ હાથ ધરી છે. ફરિયાદ મુજબ, એક યુવતીએ ખેડૂત સાથે ફોન પર મિત્રતા કેળવી હતી. બાદમાં તેને મળવા માટે હોટલમાં બોલાવવામાં આવ્યો હતો. ખેડૂત પહોંચતા જ ત્યાં હાજર અન્ય સાગરીતોએ તેને પોતાની ગાડીમાં બેસાડી અપહરણ કર્યું હોવાનું ફરિયાદમાં જણાવાયું છે.
આરોપીઓએ ખેડૂતને ધમકાવી તેની પાસેથી રૂ. 5 લાખની માંગણી કરી હતી. જેમાંથી રૂ. 54 હજાર બળજબરીપૂર્વક પડાવી લેવામાં આવ્યા હતા. ઉપરાંત ખેડૂતના મહત્વના દસ્તાવેજો પણ કબજે કરી લેવામાં આવ્યા હોવાનું સામે આવ્યું છે. બાકીના રૂ. 4.50 લાખ જલદી ચૂકવી નહી તો ગંભીર પરિણામ ભોગવવાની ધમકી પણ આપવામાં આવી હતી. ઘટનાથી ભયભીત બનેલા ખેડૂતે આખરે ગઢ પોલીસ મથકે ફરિયાદ નોંધાવતા પોલીસે કિરણ, તેની બહેનપણી પૂજા તેમજ તેજસ સોની, મયુર રાઠોડ, કમલેશ મોચી અને અજય પટણી સામે વિવિધ કલમો હેઠળ ગુનો નોંધી તપાસ શરૂ કરી છે. ગઢ પોલીસ દ્વારા સમગ્ર હની ટ્રેપ કૌભાંડના તમામ પાસાઓની તપાસ હાથ ધરવામાં આવી છે અને આરોપીઓની ભૂમિકા અંગે વધુ પૂછપરછ ચાલી રહી છે.
