પોલીસ મહા નિરીક્ષક પરિક્ષીતા રાઠોડ (બનાસકાંઠા રેન્જ) તથા જિલ્લા પોલીસ અધિક્ષક પ્રશાંત સુંબેના માર્ગદર્શન હેઠળ જાહેર જનતાના ગુમ થયેલા, પડી ગયેલા અથવા ખોવાઈ ગયેલા મોબાઈલ ફોન શોધી મૂળ માલિકોને પરત આપવાની કામગીરી હાથ ધરવામાં આવી હતી.આ સૂચનાના અનુસંધાને ડીસા વિભાગના નાયબ પોલીસ અધિક્ષક સી.એલ.સોલંકીના માર્ગદર્શન હેઠળ તથા ડીસા રૂરલ પોલીસ સ્ટેશનના પોલીસ ઈન્સ્પેક્ટર વી.જી.પ્રજાપતિના નેતૃત્વમાં ટીમ દ્વારા કાર્યવાહી કરવામાં આવી હતી.
ડીસા રૂરલ પોલીસ સ્ટેશન વિસ્તારમાં વિવિધ અરજદારોના ગુમ થયેલા મોબાઈલ ફોન અંગે મળેલી અરજીઓના આધારે ટેકનિકલ સર્વેલન્સ, હ્યુમન સોર્સિંગ અને સી.ઇ.આઈ.આરપોર્ટલની મદદથી તપાસ હાથ ધરવામાં આવી હતી. તપાસ દરમિયાન કુલ 5 મોબાઈલ ફોન (અંદાજિત રૂ.1,25,000) શોધી કાઢી “તેરા તુજકો અર્પણ” સૂત્રને સાર્થક કરતાં તેમના મૂળ માલિકોને પરત સોંપવામાં આવ્યા હતા. આ કામગીરીમાં ડીસા રૂરલ પોલીસ સ્ટેશનના પોલીસ ઈન્સ્પેક્ટર વી.જી. પ્રજાપતિ તથા મહિલા પોલીસ કોન્સ્ટેબલ ઉર્વશીબેન સહિતની ટીમે મહત્વની ભૂમિકા ભજવી હતી.આ કામગીરીને લઈ મોબાઈલ પરત મેળવનાર અરજદારોએ રૂરલ પોલીસનો આભાર વ્યક્ત કર્યો હતો.
