બનાસકાંઠા પોલીસે છાપી પોલીસ સ્ટેશન વિસ્તારમાં થયેલી કેબલ ચોરીના ગુનાઓનો ભેદ ઉકેલી બે આરોપીઓને ઝડપી પાડ્યા છે. તેમની પાસેથી 75,570 રૂપિયાનો મુદ્દામાલ જપ્ત કરવામાં આવ્યો છે. જિલ્લામાં મિલકત સંબંધિત ગુનાઓ શોધી કાઢવા માટે પોલીસ મહાનિરીક્ષક પરીક્ષિતા રાઠોડ અને પોલીસ અધિક્ષક પ્રશાંત સુંબે દ્વારા સૂચનાઓ આપવામાં આવી હતી. આ સૂચનાઓના આધારે છાપી પોલીસે કાર્યવાહી કરી હતી.
નાયબ પોલીસ અધિક્ષક ડૉ.જે.જે.ગામીત અને પોલીસ ઈન્સપેક્ટર વી.પી.આહીરના માર્ગદર્શન હેઠળ, છાપી પોલીસ સ્ટેશનના કર્મચારીઓ પેટ્રોલિંગમાં હતા. તે દરમિયાન બાતમીના આધારે આરોપીઓને સીએનજી રિક્ષા સાથે પકડી પાડવામાં આવ્યા હતા. પકડાયેલા આરોપીઓમાં અમરભાઈ રાજુભાઈ પટણી (રહે. છાપી જ્યોતિનગર, વડગામ) અને વિનુભાઈ જેઠાભાઈ દેવીપુજક (રહે. મહેંદીપુરા, માહી પાટિયા પાસે, વડગામ)નો સમાવેશ થાય છે. પૂછપરછ દરમિયાન, તેમણે છાપી પોલીસ સ્ટેશન વિસ્તારમાંથી અલગ અલગ કેબલ ચોરીઓ કર્યાની કબૂલાત કરી હતી. પોલીસે આરોપીઓ પાસેથી રજીસ્ટ્રેશન નંબર GJ 08 AT 8830 વાળી સીએનજી રિક્ષા, ચોરી કરેલા કેબલ, ખુલ્લી મોટરો અને બાળેલા વાયર સહિત કુલ 75,570 રૂપિયાનો મુદ્દામાલ કબજે કર્યો છે.
