મહેસાણા-પાલનપુર હાઇવે પર રાત્રે બનેલી ઘટનામાં જાનહાનિ ટળી : ચાલક સામે ફરિયાદ નોંધાઈ
સિદ્ધપુરના તાવડીયા ચોકડી પર મોડી રાત્રે એક સાયલો ટ્રક સર્કલ પર ચડી જતાં અકસ્માત થયો હતો. મહેસાણા-પાલનપુર હાઇવે પર રાત્રે લગભગ 1 વાગ્યે આ ઘટના બની હતી. સદનસીબે કોઈ જાનહાનિ થઈ નહોતી, પરંતુ સર્કલને નુકસાન થયું હતું.
ટ્રક ડિવાઈડર અને સિદ્ધાર્થ હોટલ પાસેના સર્કલ સાથે અથડાતાં જોરદાર અવાજ થયો હતો. આસપાસના લોકો અને વાહનચાલકો ઘટના સ્થળે એકઠા થયા હતા. મોડી રાત હોવાથી સર્કલ પર વાહનો કે રાહદારીઓની અવરજવર ઓછી હતી, તેથી મોટો અકસ્માત ટળ્યો હતો. ઘટનાની જાણ થતાં જ સ્થાનિક પોલીસ સ્થળ પર પહોંચી હતી. પોલીસે ટ્રાફિક વ્યવસ્થા પહેલા જેવી કરી કાનૂની કાર્યવાહી શરૂ કરી બેદરકારીથી ટ્રક ચલાવી અકસ્માત કરનાર ચાલક સામે ફરિયાદ નોંધી વધુ તપાસ હાથ ધરી હોવાનું જાણવા મળ્યું છે.
