PM મોદીએ રૂ. 17,300 કરોડના પ્રોજેક્ટની આપી ભેટ, દેશના પ્રથમ હાઇડ્રોજન હબ પોર્ટને આપી લીલી ઝંડી

વડાપ્રધાન નરેન્દ્ર મોદી આજે તામિલનાડુના પ્રવાસે છે. આ દરમિયાન, તેમણે થૂથુકુડીમાં લગભગ 17,300 કરોડ રૂપિયાની અનેક વિકાસ યોજનાઓનું ઉદ્ઘાટન અને શિલાન્યાસ કર્યું. આ પ્રોજેક્ટ્સમાં દેશના પ્રથમ હાઇડ્રોજન હબ પોર્ટ અને ઇનલેન્ડ વોટર વે વેસલનો સમાવેશ થાય છે. આ જહાજ ગ્રીન બોટ પહેલ હેઠળ બનાવવામાં આવ્યું છે. આ સાથે PM એ VO ચિદમ્બરનાર પોર્ટ ખાતે આઉટર હાર્બર કન્ટેનર ટર્મિનલનો શિલાન્યાસ કર્યો.

વડા પ્રધાન નરેન્દ્ર મોદીએ થૂથુકુડીમાં ગ્રીન બોટ પહેલ હેઠળ ભારતના પ્રથમ સ્વદેશી ગ્રીન હાઇડ્રોજન ફ્યુઅલ સેલ ઇનલેન્ડ વોટરવેઝ વેસલને લીલી ઝંડી બતાવી હતી. ત્યારબાદ, તેમણે થૂથુકુડી નજીક કુલશેખરાપટ્ટિનમ ખાતે ભારતીય અવકાશ સંશોધન સંસ્થા (ISRO) ના નવા પ્રક્ષેપણ સંકુલનો શિલાન્યાસ કર્યો, જેનો અંદાજે રૂ. 986 કરોડનો ખર્ચ થવાની ધારણા છે. એવું કહેવામાં આવી રહ્યું છે કે એકવાર તે તૈયાર થઈ જાય તો અહીંથી દર વર્ષે 24 લોન્ચ થઈ શકે છે. ઈસરોના આ નવા સંકુલમાં ‘મોબાઈલ લોન્ચ સ્ટ્રક્ચર’ (MLS) અને 35 કેન્દ્રોનો સમાવેશ થાય છે. આ અવકાશ સંશોધન ક્ષમતાઓને વધારવામાં મદદ કરશે.

‘એક ભારત, શ્રેષ્ઠ ભારત’ની ભાવના

આ અવસર પર પીએમ મોદીએ કહ્યું, ‘આજે તમિલનાડુ થૂથુકુડીમાં પ્રગતિનો નવો અધ્યાય લખી રહ્યું છે. અનેક પ્રોજેક્ટનું ઉદ્ઘાટન થઈ રહ્યું છે અથવા શિલાન્યાસ થઈ રહ્યો છે. આ પ્રોજેક્ટ્સ વિકસિત ભારત માટે રોડમેપનો મહત્વનો ભાગ છે. આ પ્રોજેક્ટ્સમાં ‘એક ભારત, શ્રેષ્ઠ ભારત’ની ભાવના પણ જોવા મળશે.

સત્ય કડવું છે

તેમણે કહ્યું, ‘સત્ય કડવું છે, પરંતુ સત્ય પણ જરૂરી છે. હું યુપીએ સરકાર પર સીધો આરોપ લગાવી રહ્યો છું. આજે હું જે પ્રોજેક્ટ લઈને આવ્યો છું તે અહીંના લોકોની દાયકાઓથી માંગ હતી. જેઓ આજે અહીં સત્તામાં છે, તે સમયે દિલ્હીમાં સરકાર ચલાવતા હતા, પરંતુ તેમને તમારા વિકાસની પરવા નહોતી. તેઓએ તમિલનાડુ વિશે વાત કરી, પરંતુ તમિલનાડુના કલ્યાણ માટે પગલાં ભરવાની હિંમત ન હતી. આજે હું આ રાજ્યનું ભાગ્ય લખવા સેવક તરીકે તમિલનાડુની ધરતી પર આવ્યો છું.

વડા પ્રધાન નરેન્દ્ર મોદીએ કહ્યું, ‘આજે ભારતની પ્રથમ હાઇડ્રોજન ઇંધણ ફેરી શરૂ કરવામાં આવી છે. આ ફેરી ટૂંક સમયમાં કાશીમાં ગંગા નદી પર દોડશે, એક રીતે આ તમિલનાડુના લોકો તરફથી કાશીના લોકોને મોટી ભેટ છે.

આ નવું ભારત છે

વડા પ્રધાને કહ્યું, ‘મેં એકવાર મન કી બાત કાર્યક્રમમાં કહ્યું હતું કે દેશના મુખ્ય દીવાદાંડીઓને પ્રવાસન કેન્દ્રો તરીકે વિકસાવી શકાય છે. આજે મને દેશના વિવિધ રાજ્યોમાં સ્થિત 75 દીવાદાંડીઓમાં વિકસિત પ્રવાસન સુવિધાઓ દેશને સમર્પિત કરવાનું સૌભાગ્ય મળ્યું છે…આ છે નવું ભારત.

તેમણે કહ્યું, ‘આપણા દેશમાં દાયકાઓથી જળમાર્ગો અને દરિયાઈ ક્ષેત્રની ઉપેક્ષા કરવામાં આવી હતી, પરંતુ આ ઉપેક્ષિત ક્ષેત્રો આજે વિકસિત ભારતનો પાયો બની રહ્યા છે. તેનો સૌથી વધુ ફાયદો તમિલનાડુ અને દક્ષિણ ભારતને મળી રહ્યો છે.