દિલ્હીવાસીઓ થઇ જાઓ તૈયાર! આ તારીખે આવશે ધૂળનું તોફાન

દક્ષિણ ભારતમાં ચોમાસું આવી ગયું છે. પરંતુ તેમ છતાં ઉત્તર, મધ્ય અને પૂર્વ ભારતમાં ગરમી ઓછી થઈ રહી નથી. ગરમીના કારણે અનેક લોકોએ જીવ ગુમાવ્યા છે. અહેવાલો અનુસાર દેશના વિવિધ રાજ્યોમાં ગરમીના કારણે 54 લોકોના મોત થયા છે. હવે દિલ્હી અને હરિયાણા સહિત કેટલાક રાજ્યોમાં ધૂળની ડમરીઓ આવવાની શક્યતા છે.

ધૂળના તોફાનની શક્યતા

રાજધાની દિલ્હીનું મહત્તમ તાપમાન 45 ડિગ્રી સેલ્સિયસ છે. જો કે, ભારતીય હવામાન વિભાગ (IMD) અનુસાર, 31 મે અને 1 જૂનના રોજ દિલ્હી સહિત ઉત્તર પ્રદેશના કેટલાક વિસ્તારોમાં ધૂળની ડમરીઓ આવી શકે છે. આ સિવાય 31મી મેની સાંજ સુધીમાં દિલ્હી, હરિયાણા અને ચંદીગઢમાં ધૂળની ડમરીઓ આવવાની શક્યતા છે.

દિલ્હીમાં તાપમાને રેકોર્ડ તોડ્યો

ગુરુવારે દિલ્હીમાં મહત્તમ તાપમાન 45.6 ડિગ્રી સેલ્સિયસ નોંધાયું હતું. જે સામાન્ય તાપમાન કરતા 5.2 ડિગ્રી સેલ્સિયસ વધુ છે. આ પહેલા બુધવારે દિલ્હીના તાપમાને 46.8 ડિગ્રી સેલ્સિયસ સાથે 79 વર્ષનો રેકોર્ડ તોડ્યો હતો. આ સિવાય રાજસ્થાન, હરિયાણા, ચંદીગઢ, દિલ્હી, ઝારખંડ, ઉત્તર પ્રદેશ, બિહાર, ઓડિશા, દિલ્હી, મધ્યપ્રદેશ અને વિદર્ભના ઘણા વિસ્તારોમાં 45-48 ડિગ્રી સેલ્સિયસ તાપમાન નોંધાયું હતું.

ગરમીના મોજાએ કેટલા જીવ લીધા?

નોંધનીય છે કે બિહારમાં હીટવેવને કારણે 32 લોકોના મોત થયા છે. બિહારના ઔરંગાબાદ જિલ્લામાં 17, અરાહમાં 6, ગયામાં 3, રોહતાસમાં 3, બક્સરમાં 2 અને પટનામાં 1 લોકોએ જીવ ગુમાવ્યો છે. બિહાર ઉપરાંત ઓડિશાના રાઉરકેલામાં ગરમીના કારણે 10 લોકોના મોત થયા છે. ઝારખંડના પલામાઉમાં 5, રાજસ્થાનમાં 5 અને ઉત્તર પ્રદેશના સુલતાનપુરમાં 1ના મોતના અહેવાલ છે.

IMD દ્વારા આપવામાં આવેલી માહિતી અનુસાર, દિલ્હી NCR અને આસપાસના વિસ્તારોમાં ગરમીથી રાહત નહીં મળે. 31 મે અને 1 જૂનના રોજ પંજાબ, હરિયાણા, ચંદીગઢ, દિલ્હી, રાજસ્થાન, ઉત્તર પ્રદેશ, ઝારખંડ અને ઓડિશામાં તીવ્ર ગરમીનું મોજું આવવાની અપેક્ષા છે. તેમજ મધ્યપ્રદેશ અને વિદર્ભમાં તાપમાન વધુ રહેશે.