સુપ્રીમમાં કોર્ટમાં વકીલની અરજી, કહ્યું ભીષણ ગરમીના કારણે કાળા કોટની આવશ્યકતામાં રાહત આપવામાં આવે

સુપ્રીમ કોર્ટમાં એક અરજી દાખલ કરવામાં આવી છે જેમાં કહેવામાં આવ્યું છે કે ઉનાળાની ઋતુમાં વકીલો માટે કાળા કોટની આવશ્યકતામાં રાહત આપવામાં આવે. એડવોકેટ એક્ટ 1961ના નિયમોમાં ફેરફારની માગણી કરતી અરજી સુપ્રીમ કોર્ટમાં દાખલ કરવામાં આવી છે. વકીલોના ડ્રેસ કોડ અંગેના નિયમો છે અને તેથી જ તેઓએ કાળા કોટ પહેરવા પડશે. પિટિશનમાં એવું પણ કહેવામાં આવ્યું છે કે એક કમિટી બનાવવામાં આવે અને કમિટીમાં મેડિકલ એક્સપર્ટ હોય અને વકીલોએ ઉનાળામાં કેવા કપડાં પહેરવા જોઈએ તેની તપાસ કરવામાં આવે જેથી તેમના કામ અને સ્વાસ્થ્ય પર વિપરીત અસર ન થાય.

એડવોકેટ શૈલેન્દ્ર મણિ ત્રિપાઠીએ સુપ્રીમ કોર્ટમાં કહ્યું છે કે પરંપરાગત ડ્રેસમાં છૂટછાટ આપવી જોઈએ. સુપ્રીમ કોર્ટમાં દાખલ કરાયેલી અરજીમાં કહેવામાં આવ્યું છે કે દેશભરના રાજ્યોમાં સ્થિત બાર કાઉન્સિલને તેમના રાજ્યમાં ઉનાળો ક્યારે છે તે જણાવવા માટે નિર્દેશ આપવામાં આવે જેથી તે મહિનામાં કાળા કોટ અને ગાઉનમાંથી મુક્તિ મળી શકે. અરજદારે કહ્યું કે કાળો રંગ ગરમીને શોષી લે છે અને આ રંગના કપડાને કારણે વકીલોને મુશ્કેલીનો સામનો કરવો પડે છે. તેમણે કહ્યું કે આ સલામત કામ કરવાની સ્થિતિમાં કામ કરવાના અધિકારનું ઉલ્લંઘન છે.

ભારતીય એડવોકેટ એક્ટ

તમને જણાવી દઈએ કે ભારતમાં એડવોકેટ એક્ટ 1961માં બન્યો હતો. આ અંતર્ગત ભારતમાં સુપ્રીમ કોર્ટ, હાઈકોર્ટ અને નીચલી કોર્ટ તેમજ ટ્રિબ્યુનલમાં વકીલો માટેનો ડ્રેસ નક્કી કરવામાં આવ્યો છે. આ અંતર્ગત એવો નિયમ નક્કી કરવામાં આવ્યો છે કે પુરૂષ એડવોકેટે કાળા બટનવાળો કાળો કોટ, કાળી શેરવાની અને સફેદ પટ્ટી પહેરવી પડશે અને કાળું કે સફેદ પેન્ટ અને સફેદ શર્ટ પહેરવું ફરજિયાત રહેશે. જ્યારે મહિલા વકીલોએ સફેદ અને કાળી સાડી, કાળી ફુલ કે હાફ સ્લીવ બ્લાઉઝ, લાંબો સફેદ અને કાળો સ્કર્ટ પહેરવો પડશે.

ઈંગ્લેન્ડથી શરૂ થયો ડ્રેસ કોડ

વકીલોના ડ્રેસ કોડની શરૂઆત ઈંગ્લેન્ડમાં થઈ હતી અને ત્યાં જ વકીલોનો ડ્રેસ કોડ નક્કી કરવામાં આવ્યો હતો જેને ભારતમાં પણ અપનાવવામાં આવ્યો છે. એડવર્ડ III ના શાસનકાળ દરમિયાન 1327 માં વકીલાત શરૂ થઈ હતી અને તે પછી તે નક્કી કરવામાં આવ્યું હતું કે ન્યાયાધીશોનો ડ્રેસ કેવો હોવો જોઈએ, ત્યારબાદ રોયલ કોર્ટમાં ન્યાયાધીશોનો ડ્રેસ કેવો હોવો જોઈએ તે નક્કી કરવામાં આવ્યું હતું. ન્યાયાધીશો દ્વારા પહેરવામાં આવતા વિગ અને ગાઉનની પરંપરા ઈંગ્લેન્ડમાં 1650ની આસપાસ શરૂ થઈ હતી. આ પછી, બ્રિટિશ શાહી પરિવારે 1865માં કાળો કોટ પહેરવાનો આદેશ આપ્યો અને ત્યારબાદ અદાલતોમાં કાળો કોટ પહેરવાની પરંપરા શરૂ થઈ.