અમીરગઢના આવલ ગામમાં જંગલી રીંછ ઘૂસતા લોકોમાં ફફડાટ

અમીરગઢ તાલુકાના આવલ ગામમાં અચાનક એક જંગલી રીંછ ઘૂસી આવતા સમગ્ર વિસ્તારમાં ભારે ભય અને ફફડાટનો માહોલ છવાઈ ગયો છે.જંગલમાંથી ભટકતું ભટકતું આ રીંછ સીમ વિસ્તાર પાર કરીને સીધું જ ગામના રહેણાંક વિસ્તારની શેરીઓમાં આવી પહોંચ્યું હતું. રીંછ ફરતું ફરતું લોકોના ઘરના ચોક સુધી પહોંચી જતાં સ્થાનિક લોકો જીવ બચાવવા માટે ઘરોમાં સંતાઈ ગયા હતા. જો કે, ગામમાં રીંછ ઘૂસ્યાની વાત વાયુવેગે ફેલાતા જાગૃત નાગરિકો એકઠા થઈ ગયા હતા અને સચેત રહેવા અપીલ કરી રીંછના વીડિયો સોશિયલ મીડિયા પર વાયરલ કર્યા હતા.ઘટનાની જાણ થતાં જ અમીરગઢ વન વિભાગની ટીમ તાત્કાલિક ઘટનાસ્થળે દોડી આવી હતી અને રીંછને પકડીને રેસ્ક્યૂ કરવાની તજવીજ હાથ ધરી હતી. વન વિભાગના અનુમાન મુજબ, કાળઝાળ ગરમીને કારણે પાણી અને ખોરાકની શોધમાં આ રીંછ જંગલ સરહદ છોડીને માનવ વસાહતમાં આવી ચડ્યું હતું.