બનાસકાંઠામાં કમોસમી વરસાદની આગાહી, કલેક્ટર તંત્ર દ્વારા APMC અને ખેડૂતોને એલર્ટ

બનાસકાંઠા જિલ્લાના તમામ ખેડૂતો અને વેપારી ભાઈઓ માટે હવામાન વિભાગ અને જિલ્લા વહીવટી તંત્ર તરફથી એક ખૂબ જ મહત્વના અને ચિંતાજનક સમાચાર સામે આવ્યા છે. જિલ્લામાં કમોસમી વરસાદની આગાહીને પગલે કલેક્ટર કચેરીની ડિઝાસ્ટર શાખા દ્વારા હાઈ એલર્ટ જાહેર કરી સાવચેતીના પગલાં લેવા કડક સૂચના આપવામાં આવી છે. હવામાન વિભાગ, અમદાવાદ દ્વારા ૩૦ મે થી ૩૧ મે ૨૦૨૬ સુધી બનાસકાંઠા જિલ્લામાં કમોસમી વરસાદ પડવાની સંભાવના વ્યક્ત કરવામાં આવી છે. આ પરિસ્થિતિને ધ્યાનમાં રાખીને જિલ્લાની તમામ ખેતીવાડી ઉત્પન્ન બજાર સમિતિઓ એટલે કે APMC અને તેના પેટા કેન્દ્રોને તાકીદ કરવામાં આવી છે કે, ખુલ્લામાં રાખવામાં આવેલ અનાજ અને અનાજની બોરીઓ વરસાદી પાણીથી પલળી ન જાય તે માટે તાત્કાલિક શેડ અથવા યોગ્ય વ્યવસ્થા કરવામાં આવે. આ ઉપરાંત ડિઝાસ્ટર શાખા દ્વારા ખેડૂતોને પણ સૂચના આપવામાં આવી છે કે, માર્કેટ યાર્ડમાં અનાજ લાવતી વખતે કે પરિવહન દરમિયાન પાક સુરક્ષિત રહે તેની કાળજી રાખે. જો કોઈ પાક ખેતરમાં કાપેલો પડ્યો હોય, તો તેને તાત્કાલિક તાડપત્રીથી ઢાંકી દેવા અપીલ કરાઈ છે.