સવારે ડોકટર હાઉસ પાસે બાઇકમાં આગ:સાંજે ધનિયાણા ચોકડી પર એક્ટિવા સળગી ઊઠયુ
પાલનપુર શહેરમાં એક જ દિવસમાં બે અલગ-અલગ સ્થળોએ ટુ-વ્હીલરમાં આગ લાગવાની ઘટના સામે આવી છે. સવારે ડોકટર હાઉસ વિસ્તારમાં બાઇકમાં આગ લાગ્યા બાદ સાંજે ધનિયાણા ચોકડી પાસે એક્ટિવામાં અચાનક આગ ભભૂકી ઉઠતાં અફરાતફરીનો માહોલ સર્જાયો હતો.
ધનિયાણા ચોકડી પાસે રસ્તા વચ્ચે એક્ટિવામાં આગ લાગતા વાહનચાલકોમાં દોડધામ મચી હતી. આગની જ્વાળાઓ ઊઠતાં સ્થાનિકોએ પાણીના ટેન્કરની મદદથી આગ ઓલવવાનો પ્રયાસ કર્યો હતો. આગના કારણે રસ્તા પર ટ્રાફિક વ્યવસ્થા પણ ખોરવાઈ ગઈ હતી.
એક્ટિવામાં લાગેલી આગ કાબૂમાં આવ્યા બાદ રસ્તા પરથી વાહન હટાવી ટ્રાફિક વ્યવસ્થા પૂર્વવત કરવામાં આવી હતી. જોકે, પાલનપુરમાં એક જ દિવસમાં બે ટુ-વ્હીલર માં આગ લાગવાની ઘટનાએ વાહનચાલકોમાં ચર્ચા જગાવી છે.
