રશિયાએ કિવ પર મોટો હુમલો કર્યો, 31 લોકોના મોત

યુક્રેનની રાજધાની કિવ પર રશિયન ડ્રોન અને મિસાઇલ હુમલામાં 5 બાળકો સહિત 31 લોકોના મોત થયાના એક દિવસ બાદ શુક્રવારે શહેરમાં સત્તાવાર શોક દિવસ મનાવવામાં આવ્યો. આ હુમલામાં 150 થી વધુ લોકો ઘાયલ થયા છે. હુમલાઓ અંગે યુક્રેનના રાષ્ટ્રપતિ વોલોડીમીર ઝેલેન્સકીએ જણાવ્યું હતું કે ગુરુવારના હુમલામાં સૌથી નાની વયનો ભોગ બનનાર બે વર્ષનો હતો, ઘાયલોમાં 16 બાળકોનો સમાવેશ થાય છે. સત્તાવાર આંકડાઓ અનુસાર, ઓક્ટોબર 2022 માં શહેર પર હવાઈ હુમલા શરૂ થયા પછી કિવ પર એક જ હુમલામાં માર્યા ગયેલા અને ઘાયલ થયેલા બાળકોની આ સૌથી વધુ સંખ્યા છે. વોલોડીમીર ઝેલેન્સકીએ કહ્યું, "આ હુમલામાં અત્યાર સુધીમાં 31 લોકોના મોતની પુષ્ટિ થઈ છે, જેમાં 5 બાળકોનો પણ સમાવેશ થાય છે. સૌથી નાનો બાળક માત્ર બે વર્ષનો હતો. મૃતકોના પરિવારો અને પ્રિયજનો પ્રત્યે મારી સંવેદના છે. 16 બાળકો સહિત 159 લોકો ઘાયલ થયા છે. હાલમાં દરેકને જરૂરી તબીબી સહાય મળી રહી છે. હું બચાવ કાર્યકરો, પોલીસ અધિકારીઓ, ડોકટરો, નર્સો અને આ સમયે લોકોને મદદ કરી રહેલા તમામ લોકોનો આભારી છું."