થરાદમાં લૂંટારુ યુવતીનો આતંક, વૃદ્ધાને ગંભીર ઈજા પહોંચાડી તિજોરી સાફ કરી ફરાર

થરાદ શહેરના હર્ષ બંગલોઝ વિસ્તારમાં ધોળા દિવસે ચોરી અને જીવલેણ હુમલાની એક સનસનાટીભરી ઘટના સામે આવી છે. એક અજાણી યુવતીએ ઘરમાં ઘૂસીને વૃદ્ધ મહિલા પર હુમલો કર્યો અને તિજોરીમાંથી કિંમતી સામાન લઈને ફરાર થઈ ગઈ હોવાનું સામે આવ્યું છે.મળતી માહિતી મુજબ, આરોપી યુવતી પહેલા ઘરમાં આવી હતી અને સીએમ જ્વેલર્સમાં નોકરી અંગે પૂછપરછ કરી હતી. તે સમયે ઘરમાં હાજર મહિલાએ તેને દુકાને જઈને વાત કરવા જણાવ્યું હતું. પ્રાથમિક માહિતી અનુસાર યુવતીએ આ દરમિયાન ઘરની રેકી કરી હોવાનું માનવામાં આવી રહ્યું છે.

ત્યારબાદ મોડી બપોરે તે ફરી ઘરમાં આવી પહોંચી. તે સમયે વૃદ્ધ મહિલા ઘરમાં એકલા હતા. આરોપી યુવતીએ લોખંડની કોસ વડે તેમના માથા અને હાથના ભાગે ગંભીર હુમલો કર્યો, જેના કારણે મહિલા લોહીલુહાણ થઈ ગયા.હુમલા બાદ યુવતીએ ઘરની તિજોરી ખોલી અને તેમાં રહેલું પાકીટ લઈને થોડા જ સમયમાં ઘટનાસ્થળેથી ફરાર થઈ ગઈ.પરિવારજનોએ તાત્કાલિક થરાદ પોલીસને જાણ કરી હતી. હાલ પોલીસ સીસીટીવી ફૂટેજના આધારે આરોપીની ઓળખ અને શોધખોળ માટે તપાસ ચલાવી રહી છે.આ મામલે વધુ વિગતો પોલીસ તપાસ બાદ સામે આવશે.