પોલીસ વિભાગના અધિકારીઓ અને કર્મચારીઓની વ્યસ્ત તેમજ તણાવપૂર્ણ દિનચર્યાને ધ્યાનમાં રાખીને તેમના સ્વાસ્થ્યની સુખાકારી માટે એક વિશેષ પહેલ કરવામાં આવી છે. આજ રોજ તાલુકા આરોગ્ય કચેરી ભાભર દ્વારા, તાલુકા હેલ્થ ઓફિસર ડૉ. હિતેન્દ્ર ઠાકોરના સીધા નેતૃત્વ અને માર્ગદર્શન હેઠળ ભાભર પોલીસ સ્ટેશન ખાતે બિન-ચેપી રોગો (એનએસડી) નિદાન અને સારવાર કેમ્પનું સફળ આયોજન કરવામાં આવ્યું હતું.
આ હેલ્થ કેમ્પ અંતર્ગત ભાભર પોલીસ કચેરીના તમામ પોલીસ કર્મીઓ અને વહીવટી સ્ટાફનું સંપૂર્ણ સ્વાસ્થ્ય પરીક્ષણ કરવામાં આવ્યું હતું. જેમાં મુખ્યત્વે બ્લડ પ્રેશર (બીપી), ડાયાબિટીસ (સુગર) તેમજ અન્ય શારીરિક તકલીફોનું ઝીણવટભર્યું ચેકઅપ કરવામાં આવ્યું હતું. તાલુકા હેલ્થ ઓફિસર ડૉ. હિતેન્દ્ર ઠાકોર અને તેમની તબીબી ટીમ દ્વારા ઉપસ્થિત તમામ પોલીસ કર્મચારીઓને સ્વાસ્થ્ય કેવી રીતે સારું રાખવું, માનસિક તણાવથી કેવી રીતે મુક્ત રહેવું અને યોગ્ય આહાર-વિહારનું પાલન કઈ રીતે કરવું તે અંગે વિસ્તૃત અને ઉપયોગી માર્ગદર્શન પૂરું પાડવામાં આવ્યું હતું. પોલીસ સ્ટાફે આરોગ્ય વિભાગની આ કામગીરીને બિરદાવી હતી. તેમના દ્વારા તમામ આરોગ્ય વિભાગના સ્ટાફને સાથ સહકાર મળેલ. પોતાની ફરજની સાથે સ્વાસ્થ્ય પ્રત્યે જાગૃત રહેવાનો સંકલ્પ વ્યક્ત કર્યો હતો.
