ડીસામાં ખેડૂત ગર્જના: કોંગ્રેસે આખોલ ચાર રસ્તા જામ કર્યા

બનાસકાંઠાના ડીસામાં ખેડૂતોના હક અને પડતર પ્રશ્નોના નિરાકરણની માંગ સાથે આજે કોંગ્રેસ દ્વારા ઉગ્ર વિરોધ પ્રદર્શન કરવામાં આવ્યું હતું. કોંગ્રેસના કાર્યકરો અને મોટી સંખ્યામાં ખેડૂતોએ એકત્ર થઈને ડીસાના આખોલ ચાર રસ્તા પર ચક્કાજામ કરીને સરકાર વિરુદ્ધ સૂત્રોચ્ચાર કર્યા હતા.  આંદોલનકારીઓએ રસ્તા પર બેસી જઈને માર્ગ બંધ કરી દેતા ભારે ટ્રાફિકજામની સ્થિતિ સર્જાઈ હતી. રસ્તો બ્લોક થવાને કારણે વાહનચાલકોને ભારે હાલાકીનો સામનો કરવો પડ્યો હતો.

ખેડૂતોએ આક્રોશ વ્યક્ત કરતા જણાવ્યું હતું કે, જ્યાં સુધી સરકાર અમારી પડતર માંગણીઓનો સકારાત્મક ઉકેલ નહીં લાવે ત્યાં સુધી અમારો સંઘર્ષ ચાલુ રહેશે.ઘટનાની જાણ થતા જ સ્થાનિક પોલીસનો કાફલો તાત્કાલિક સ્થળ પર પહોંચી ગયો હતો. પોલીસે આંદોલનકારી કોંગ્રેસના કાર્યકરો અને ખેડૂતોને સમજાવટના પ્રયાસો કર્યા હતા. લાંબી સમજાવટ અને સમજણ બાદ આખરે આંદોલનકારીઓ રસ્તા પરથી ખસી ગયા હતા, ત્યારબાદ પોલીસ દ્વારા વાહનવ્યવહાર પૂર્વવત કરાવવામાં આવ્યો હતો. ​આ વિરોધ પ્રદર્શનના માધ્યમથી કોંગ્રેસે સરકારને ચેતવણી આપી છે કે જો ખેડૂતોના પ્રશ્નો તાત્કાલિક ઉકેલવામાં નહીં આવે તો આગામી દિવસોમાં આંદોલન વધુ ઉગ્ર બનાવવામાં આવશે.