હારીજ એસ.બી.આઈ. રોડ પર આવેલા આ શોપિંગ સેન્ટરની ત્રણ-ચાર દુકાનોની છત અચાનક તૂટી પડી હતી. જેમાં બાઇક પર ઉભેલા અજમલભાઈ કાળુભાઈ ભરવાડ (ઉં.વ. 27, ટુવડ) ગંભીર રીતે ઇજાગ્રસ્ત થયા હતા. તેમને તાત્કાલિક ખાનગી દવાખાનામાં પ્રાથમિક સારવાર આપી 108 એમ્બ્યુલન્સ મારફતે પાટણની જનતા હોસ્પિટલમાં ખસેડવામાં આવ્યા હતા. આ ઉપરાંત, એક મહિલાને પણ ઇજાઓ થતાં નજીકના દવાખાનામાં સારવાર આપવામાં આવી હતી.
ઘટના સમયે બપોરનો ગરમીનો સમય હોવાથી અને લગ્નસરાની સિઝન ધીમી પડી ગઈ હોવાથી બજારમાં લોકોની અવરજવર ઓછી હોવાથી મોટી જાનહાનિ ટળી હતી. દુકાનોમાં ખરીદી કરી રહેલા ગ્રાહકોનો આબાદ બચાવ થયો હતો. આ દુર્ઘટના બાદ ઘટના સ્થળે લોકોના ટોળા ઉમટી પડ્યા હતા.
