ચાણસ્મા હાઈવે પરથી વોડાફોન કંપનીનો રૂ. 2.50 લાખની કિંમતનો 4000 મીટર નેટ કેબલ વાયરનું ડ્રમ ચોરાઈ ગયું હતું. આ ઘટના ચાણસ્મા હાઈવે રોડ પર રેલ્વે ફાટક નજીક આવેલા સાંઈબાબા મંદિર પાસેથી બની હતી. આ અંગે અજાણ્યા ચોર ઈસમો વિરુદ્ધ ચાણસ્મા પોલીસ સ્ટેશનમાં ગુનો નોંધવામાં આવ્યો હતો.
રાધનપુર તાલુકાના મઘાપુર ગામના વતની અને વોડાફોન કંપનીના પેટા કોન્ટ્રાક્ટર ધરમસિંહ પાંચાભાઈ ઠાકોરે આ અંગે ફરિયાદ નોંધાવી હતી. છેલ્લા 15 થી 20 દિવસથી મહેસાણા રોડ પર વડાવલી ત્રણ રસ્તા અને ચાણસ્મા હાઈવે સર્કલ ખાતે વોડાફોન કંપની દ્વારા નેટ કેબલ જમીનમાં નાખવાની કામગીરી ચાલી રહી હતી.કેબલ વાયર ચોરીની આ ઘટનામાં ચાણસ્મા પોલીસે ઝડપી કાર્યવાહી કરી ત્રણ આરોપીઓને ઝડપી પાડ્યા છે.
પોલીસે ચોરીમાં વપરાયેલ બાઈક અને ચોરાયેલ કેબલ વાયરનો જથ્થો જપ્ત કરી આગળની કાયદેસરની કાર્યવાહી હાથ ધરી છે.પોલીસ દ્વારા પકડાયેલા આરોપીઓમાં ચેતનસિંહ શાંતુભા ઝાલા (રહે. સુણસર આંબલીપુરા, તા. ચાણસ્મા, જી. પાટણ), રચીન હિરૂભા અભેસંગ ઝાલા (રહે. સુણસર તળપોદ પાટી, તા. ચાણસ્મા, જી. પાટણ) અને કનકસિંહ સેંધુભા વાલસંગજી ઝાલા (રહે. સુણસર તળપોદ પાટી, તા. ચાણસ્મા,જી.પાટણ) નો સમાવેશ થાય છે. જયારે આ ગુનામાં મનુભા ભગવતસિંહ ઝાલા (રહે.સુણસર આંબલીપુરા,તા. ચાણસ્મા, જી. પાટણ) નામનો એક આરોપી હજુ ફરાર છે, જેને પકડવા માટે પોલીસે વધુ તપાસ હાથ ધરી હોવાનું જાણવા મળ્યું છે.
