કમિટીઓના ચેરમેનોએ ચાર્જ સાંભળતા વહીવટ વેગવંતો બનશે
ભાજપ શાસિત પાલનપુર નગર પાલિકાની વિવિધ કમિટી ઓની રચના તાજેતરમાં સંપન્ન થઈ હતી. ત્યારે આજે વિવિધ કમિટીઓના ચેરમેનોએ પોતાના શુભેચ્છકોની હાજરીમાં પદભાર સંભાળ્યો હતો. પાલનપુર નગરપાલિકામાં લાંબા સમય બાદ 20 જેટલી વિવિધ કમિટીઓની રચના કરવામાં આવી હતી. જોકે, કમિટીના ચેરમેનની વરણીમાં પહેલીવાર ચૂંટાઈ આવેલા નવા નગરસેવકોને લોટરી લાગી હતી. ત્યારે પાલિકાની કારોબારી, ટીપી, બાંધકામ, સેનિટેશન અને પાણી પુરવઠા સહિતની વિવિધ 20 કમિટી ઓના ચેરમેનોએ ચાર્જ સંભાળ્યો હતો.
કારોબારી ચેરમેન નાગજીભાઈ દેસાઈ, બાંધકામ કમિટીના ચેરમેન અંકુરભાઈ જોશી, સેનિટેશન કમીટી ચેરમેન કૃણાલ પઢીયાર, ભૂગર્ભ ચેરમેન મિતાબેન સોની, પાણી પુરવઠા ચેરમેન ગીતાબેન પુરોહિત સહિતના ચેરમેનોએ 12:39 ના ટકોરે પોતાના હોદાનો ચાર્જ સંભાળ્યો હતો. આ પ્રસંગે પાલિકા પ્રમુખ સુનિતાબેન પટેલે તમામ ચેરમેનોને શુભેચ્છાઓ પાઠવી હતી.
આ પ્રસંગે વિવિધ કમિટીઓના ચેરમેનોના શુભેચ્છકો અને ટેકેદારોએ વિશાળ સંખ્યામાં ઉપસ્થિત રહી શુભેચ્છાઓ પાઠવી હતી. જોકે, કમિટીઓ અસ્તિત્વમાં આવતા હવે પાલિકાનો વહીવટ વેગવંતો બનશે તેવો આશાવાદ સેવાઈ રહ્યો છે.
