બહુચરાજી માર્કેટ યાર્ડ (APMC) ની આગામી ચૂંટણી માટે ચૂંટણી પ્રક્રિયા સત્તાવાર રીતે શરૂ થઈ ગઈ છે. ખેડૂત અને વેપારી વિભાગના 14 ડિરેક્ટરોની પસંદગી માટે ઉત્સાહ જોવા મળી રહ્યો છે, જેના ભાગરૂપે ઉમેદવારી ફોર્મ ભરવાની પ્રક્રિયાનો આરંભ થઈ ચૂક્યો છે. ચૂંટણી પંચ દ્વારા જાહેર કરવામાં આવેલા કાર્યક્રમ મુજબ, ઉમેદવારો પોતાના સમર્થકો સાથે ઉત્સાહભેર ફોર્મ ભરી રહ્યા છે. આ ચૂંટણીમાં લોકશાહીઢબે મતદાન યોજાય તે માટે તંત્ર દ્વારા તમામ તૈયારીઓ પૂર્ણ કરી લેવામાં આવી છે.
આગામી 9 સપ્ટેમ્બરના રોજ મતદાન યોજાશે, જેમાં મતદારો પોતાના મતાધિકારનો ઉપયોગ કરીને નવા નેતૃત્વની પસંદગી કરશે. મતદાન પ્રક્રિયા પૂર્ણ થયા બાદ મતગણતરી હાથ ધરીને વિજેતા ઉમેદવારોના નામ જાહેર કરવામાં આવશે. APMCની આ ચૂંટણીને લઈને સ્થાનિક રાજકારણમાં પણ ગરમાવો આવી ગયો છે અને વિવિધ જૂથો દ્વારા લોબિંગ શરૂ થઈ ગયું છે.આ ચૂંટણીમાં કયા પક્ષ કે જૂથનું વર્ચસ્વ સ્થાપિત થશે તે તો પરિણામ બાદ જ જાણી શકાશે, પરંતુ ખેડૂતો અને વેપારીઓમાં ભારે ઉત્સુકતા જોવા મળી રહી છે.
