બુધવારે મધ્ય થાઈલેન્ડમાં એક ફટાકડા ફેક્ટરીમાં થયેલા વિસ્ફોટમાં ઓછામાં ઓછા નવ લોકોના મોત થયા છે. સ્થાનિક અધિકારીઓએ આ ઘટના અંગે માહિતી આપી છે. આ વિસ્ફોટ બેંગકોકથી લગભગ 95 કિલોમીટર ઉત્તરપશ્ચિમમાં આવેલા સુફાન બુરી પ્રાંતમાં થયો હતો. વિસ્ફોટનું કારણ હજુ સુધી જાણી શકાયું નથી. 'સમરકુન સુફાન બુરી રેસ્ક્યુ ફાઉન્ડેશન' એ ફટાકડા ફેક્ટરીમાં થયેલા વિસ્ફોટમાં નવ લોકોના મોતની જાણ કરી છે અને કહ્યું છે કે બે લોકોને ગંભીર હાલતમાં હોસ્પિટલમાં લઈ જવામાં આવ્યા છે. પ્રાંતીય સરકારના જનસંપર્ક વિભાગે કહ્યું છે કે આ ઘટનામાં એક વ્યક્તિ ઘાયલ થયો છે. ગુમ થયેલા લોકોની સંખ્યા હજુ સ્પષ્ટ નથી. સિનિયર પોલીસ સાર્જન્ટ મેજર પિન્યો ચાનમાનીએ જણાવ્યું હતું કે વિસ્ફોટ ફટાકડા બનાવતી ઇમારતમાં થયો હતો. ફેક્ટરીને ફટાકડા બનાવવાનું લાઇસન્સ આપવામાં આવ્યું હતું કે નહીં તે સ્પષ્ટ નથી. ઘટનાસ્થળના વીડિયો અને ફોટામાં ખેતરોમાં ક્ષતિગ્રસ્ત લાકડાના મકાનો દેખાય છે. જાન્યુઆરી 2024માં આ જ વિસ્તારમાં બનેલી આવી જ ઘટનામાં લગભગ 20 લોકો માર્યા ગયા હતા. અધિકારીઓના જણાવ્યા અનુસાર જુલાઈ 2023માં દક્ષિણ થાઇલેન્ડમાં ફટાકડાના વેરહાઉસમાં થયેલા પ્રચંડ વિસ્ફોટમાં ઓછામાં ઓછા 10 લોકો માર્યા ગયા હતા અને 100 થી વધુ ઘાયલ થયા હતા.
થાઈલેન્ડમાં એક દુ:ખદ અકસ્માત થયો, ફટાકડાની ફેક્ટરીમાં ભયાનક વિસ્ફોટ; 9 લોકોના મોત
