રાશન કૌભાંડ: એક્શન મોડમાં ED, ફરાર TMC નેતા શેખ શાહજહાંની નજીકના સ્થળો પર દરોડા

પબ્લિક ડિસ્ટ્રિબ્યુશન સિસ્ટમ (PDS) કૌભાંડ કેસમાં ફરાર તૃણમૂલ કોંગ્રેસના નેતા શેખ શાહજહાં સામે ચાલી રહેલી તપાસમાં પશ્ચિમ બંગાળમાં એન્ફોર્સમેન્ટ ડિરેક્ટોરેટ (ED) એ શુક્રવારે રાજ્યમાં લગભગ છ સ્થળોએ દરોડા પાડ્યા હતા. મધ્ય હાવડામાં શેખ શાહજહાંના નજીકના સહયોગી પાર્થ પ્રતિમ સેનગુપ્તાના ઘર પર દરોડો પાડવામાં આવ્યો હતો. આ જાણકારી ED અધિકારીઓએ આપી છે.

EDએ 29 ફેબ્રુઆરીએ શાહજહાંને તપાસમાં જોડાવા માટે નવેસરથી સમન્સ જારી કર્યાના એક દિવસ બાદ દરોડા પાડવામાં આવ્યા હતા. એક અધિકારીનું કહેવું છે કે, આ દરોડા શાહજહાં શેખ અને તેના સહયોગીઓ સામે છેતરપિંડી કરીને જમીન હડપ કરવાના જૂના કેસના સંબંધમાં છે. આ લોકો શાહજહાં સાથે માછલીના વ્યવસાયમાં જોડાયેલા હતા. એજન્સી કેટલાક ચોક્કસ દસ્તાવેજો શોધી રહી છે.

સવારથી કોલકાતા અને આસપાસના કુલ 6 સ્થળો પર સર્ચ કરવામાં આવી રહ્યું છે. EDને જાણવા મળ્યું છે કે પાર્થ પ્રતિમ સેનગુપ્તાએ તાજેતરમાં બે નવા મકાનો ખરીદ્યા છે. મકાન ખરીદવા માટે પૈસા ક્યાંથી એકત્ર કરવામાં આવ્યા તે જાણવા માટે એજન્સી દસ્તાવેજોની તપાસ કરી રહી છે. આ સિવાય વિજયગઢના પુકુર નંબર 10 વિસ્તારમાં એક પૂર્વ સરકારી કર્મચારીના ઘરે પણ સર્ચ ચાલી રહ્યું છે. પૂર્વ સરકારી કર્મચારી અરૂપ સોમ લાંબા સમયથી માછલીનો વ્યવસાય કરે છે.

સૂત્રોનું એમ પણ કહેવું છે કે તે શાહજહાંની નજીક છે. આ પહેલા 5 જાન્યુઆરીએ ED અધિકારીઓની ટીમ પર ટોળાએ હુમલો કર્યો હતો. એજન્સીએ સંદેશખાલીમાં શાહજહાંના ઘર પર દરોડા પાડવાનો પ્રયાસ કર્યો હતો. આ હુમલા દરમિયાન ત્રણ અધિકારીઓ ઘાયલ થયા હતા. ત્યારથી શાહજહાં ફરાર છે. આ ઉપરાંત, કેટલીક સ્થાનિક મહિલાઓએ શાહજહાં અને તેના માણસો પર ગેંગ રેપ અને બળજબરીથી જમીન હડપ કરવાનો આરોપ લગાવ્યો છે. EDએ તેમને ચાર વખત સમન્સ મોકલ્યા છે.