કેજરીવાલ પર વધુ સકંજો કસશે, AAP નેતાના ‘જામીન’ પહેલા EDએ કરી છે આ મોટી તૈયારી

દારૂ કૌભાંડ સંબંધિત મની લોન્ડરિંગ કેસમાં જેલમાં રહેલા અરવિંદ કેજરીવાલની મુશ્કેલીઓ વધવા જઈ રહી છે. ઈન્ડિયા ટુડેના અહેવાલ મુજબ એન્ફોર્સમેન્ટ ડિરેક્ટોરેટ (ED) કથિત કૌભાંડમાં અરવિંદ કેજરીવાલ સામે આવતીકાલે (10 મે) પ્રથમ ચાર્જશીટ દાખલ કરશે. ચાર્જશીટમાં EDએ કેજરીવાલને દારૂ કૌભાંડનો ‘કિંગપિન’ અને મુખ્ય ‘ષડયંત્રકાર’ ગણાવ્યો છે. જામીન પહેલા તપાસ એજન્સી દ્વારા કરવામાં આવેલી આ તૈયારી કેજરીવાલ માટે કોઈ મોટા ઝટકાથી ઓછી નથી. જાણવા મળે છે કે કેજરીવાલના વચગાળાના જામીન પર શુક્રવારે સુપ્રીમ કોર્ટમાં સુનાવણી થવાની છે.

અગાઉ, મંગળવારે જામીનની સુનાવણી દરમિયાન, સુપ્રીમ કોર્ટે કહ્યું હતું કે આ એક અસાધારણ સ્થિતિ છે કારણ કે લોકસભાની ચૂંટણીઓ યોજાઈ રહી છે. જસ્ટિસ સંજીવ ખન્ના અને જસ્ટિસ દીપાંકર દત્તાની ખંડપીઠે કહ્યું કે કેજરીવાલ ટેવાયેલા ગુનેગાર નથી. તેમણે કહ્યું, ‘તે દિલ્હીના મુખ્યમંત્રી અને ચૂંટાયેલા નેતા છે. ચૂંટણીઓ થઈ રહી છે. આ એક અસાધારણ સ્થિતિ છે. એવું નથી કે તે રીઢો ગુનેગાર છે. અમે તેને વચગાળાના જામીન પર છોડવો જોઈએ કે નહીં તે અંગેની દલીલો સાંભળીને વિચારણા કરીશું.

સર્વોચ્ચ અદાલતે મુખ્ય પ્રધાન વતી હાજર રહેલા વરિષ્ઠ વકીલ અભિષેક સિંઘવીને કહ્યું હતું કે, વચગાળાના જામીન મળ્યા બાદ તેઓ સરકારી કામ કરે તેવું કોર્ટ ઈચ્છતી નથી. બેન્ચે કહ્યું, ‘જો તમે સરકારી કામ કરશો તો તે હિતોનો ટકરાવ હશે અને અમે એવું નથી ઈચ્છતા.’ સિંઘવીએ ખંડપીઠને ખાતરી આપી હતી કે જો કેજરીવાલને આ કેસમાં વચગાળાના જામીન મળે છે, તો તેઓ એક્સાઇઝ પોલિસી કૌભાંડ સંબંધિત કોઈ ફાઇલ જોશે નહીં.

EDએ શું આપી દલીલ?

EDએ કેજરીવાલ માટે વચગાળાના જામીન પર સુનાવણી કરવાના સર્વોચ્ચ અદાલતના અભિપ્રાયનો વિરોધ કર્યો હતો અને કહ્યું હતું કે અદાલત નેતાઓ માટે અલગ શ્રેણી બનાવી શકે નહીં. ED વતી સોલિસિટર જનરલ તુષાર મહેતાએ કહ્યું, ‘હાલમાં દેશમાં સાંસદો સંબંધિત લગભગ 5,000 કેસ પેન્ડિંગ છે. શું આ તમામને જામીન પર છોડવામાં આવશે? શું ખેડૂત એવા નેતા કરતાં ઓછો મહત્વનો છે કે જેના માટે પાકની લણણી અને વાવણીની મોસમ હોય છે?’ મહેતાએ કહ્યું કે જો કેજરીવાલે તપાસમાં સહકાર આપ્યો હોત તો તેમની ધરપકડ ન થઈ હોત, પરંતુ તેમણે નવ સમન્સની અવગણના કરી હતી.