નેપાળમાં ભયાનક માર્ગ અકસ્માત, બસ ત્રિશુલી નદીમાં પડતાં સાતનાં મોત, 30 ઘાયલ

નેપાળના બાગમતી પ્રાંતમાં બુધવારે વહેલી સવારે એક પેસેન્જર બસ નદીમાં ખાબકતા એક મહિલા સહિત સાત લોકોના મોત થયા હતા અને 30 અન્ય ઘાયલ થયા હતા. સમાચાર મુજબ ઘાટબેસી વિસ્તારમાં કાઠમંડુ જઈ રહેલી પેસેન્જર બસ પર ડ્રાઈવર કાબૂ ન રાખી શક્યો અને તે ત્રિશુલી નદીમાં ખાબકતાં હતી.

ધાડિંગ જિલ્લા પોલીસ કચેરીના પોલીસ અધિક્ષક (એસપી) ગૌતમ કેસીના જણાવ્યા અનુસાર, આ અકસ્માતમાં એક મહિલા સહિત સાત લોકોના મોત થયા છે.

આ અકસ્માતમાં 30 મુસાફરો ઘાયલ

તેમણે કહ્યું કે આ દુર્ઘટનામાં ઓછામાં ઓછા 30 મુસાફરો ઘાયલ થયા છે. નેપાળ પોલીસ, આર્મ્ડ પોલીસ ફોર્સ અને નેપાળ આર્મી સાથે સ્થાનિક લોકોએ આ લોકોને બચાવ્યા હતા. મીડિયા અહેવાલો અનુસાર, ગૌતમ કેસીએ જણાવ્યું હતું કે ઘાયલોને બચાવી લેવામાં આવ્યા હતા અને સ્થાનિક આરોગ્ય સુવિધામાં પ્રાથમિક સારવાર બાદ તેમને વધુ સારવાર માટે કાઠમંડુ લઈ જવામાં આવ્યા હતા.

પોલીસે બસ ચાલકની ધરપકડ કરી

સમાચાર અનુસાર, મૃતકોની ઓળખ હજુ સુધી થઈ નથી. પોલીસે બસ ડ્રાઈવરની ધરપકડ કરી લીધી છે. જ્યારે બસ નદીમાં પડી ત્યારે મુસાફરોને થયેલી ઇજાઓને ધ્યાનમાં રાખીને મૃત્યુઆંક વધવાની ધારણા છે. અહેવાલમાં જણાવાયું છે કે સશસ્ત્ર પોલીસ દળો અને ડિઝાસ્ટર મેનેજમેન્ટ ટ્રેનિંગ સ્કૂલ, કુરિન્તર, ચિતવનની એક ટીમ પણ બચાવ કામગીરીમાં સામેલ હતી.