![](https://www.rakhewaldaily.com/wp-content/uploads/2024/04/પાકિસ્તાનમાં-સિંધુ-નદીમાં-હેડ.jpg)
પાકિસ્તાનમાં સિંધુ નદીમાં હોડી પલટી જતાં 15 લોકો ડૂબી ગયા, 4 હજુ પણ લાપતા
પાકિસ્તાનના ખૈબર પખ્તુનખ્વા પ્રાંતમાં ગુરુવારે સિંધુ નદીમાં એક હોડી પલટી જતાં ઓછામાં ઓછા 15 લોકો ડૂબી ગયા હતા. બચાવ કાર્ય સાથે જોડાયેલા અધિકારીઓએ જણાવ્યું કે આ દુર્ઘટના નૌશેરા જિલ્લાના કુંદ પાર્ક વિસ્તારમાં બની હતી, જ્યાં મોટી સંખ્યામાં લોકો ઈદની ઉજવણી કરવા માટે એકઠા થયા હતા. અધિકારીઓએ જણાવ્યું કે તેઓએ 11 લોકોને બચાવ્યા. તેમણે કહ્યું કે ચાર ગુમ થયેલા લોકોની શોધ ચાલી રહી છે. તેમણે કહ્યું કે નૌશેરા, સ્વાબી અને મર્દાનની બચાવ ટુકડીઓ સર્ચ ઓપરેશનમાં ભાગ લઈ રહી છે.
પાકિસ્તાનના સિંધ અને બલૂચિસ્તાન પ્રાંતમાં સરહદી શહેર નજીક તીર્થયાત્રીઓને લઈ જતી બસ ઊંડી ખીણમાં પડતાં ઓછામાં ઓછા 17 લોકોના મોત થયા હતા અને અન્ય 38 લોકો ઘાયલ થયા હતા. પોલીસે જણાવ્યું કે, તીર્થયાત્રીઓ બલૂચિસ્તાનના ખુઝદાર જિલ્લામાં દૂરસ્થ મુસ્લિમ સૂફી દરગાહ શાહ નૂરાની જઈ રહ્યા હતા ત્યારે બુધવારે તેમની બસ હબ શહેરમાં ખાડામાં પડી ગઈ હતી. જ્યાં અકસ્માત થયો તે સ્થળ કરાચીથી લગભગ 100 કિલોમીટર દૂર છે. ગૃહમંત્રી મોહસિન નકવીએ આ ઘટના પર શોક વ્યક્ત કર્યો અને કહ્યું કે એવું લાગે છે કે એક વળાંક પર ડ્રાઈવરે નિયંત્રણ ગુમાવ્યું હતું જેના કારણે બસ ખાઈમાં પડી હતી.
તમામ મુસાફરો સિંધ પ્રાંતના થટ્ટા શહેરના રહેવાસી હતા.નકવીએ જણાવ્યું હતું કે વાહન બુધવારે બપોરે લગભગ 2 વાગ્યે થટ્ટાથી નીકળ્યું હતું અને બુધવારે રાત્રે લગભગ 8 વાગ્યે અકસ્માતનો ભોગ બન્યો હતો. હબના એક સ્થાનિક પોલીસ અધિકારીએ જણાવ્યું હતું કે મૃતકો અને ઘાયલોને કરાચી સિવિલ હોસ્પિટલમાં લઈ જવામાં આવ્યા હતા. મૃતદેહોની ઓળખ કરવામાં આવી હતી, જેમાંથી કેટલાક એક જ પરિવારના હતા. ખરાબ રસ્તાઓ, સલામતીની જાગૃતિનો અભાવ અને ટ્રાફિક નિયમોની સ્પષ્ટ અવગણનાને કારણે પાકિસ્તાનમાં ઘણીવાર જીવલેણ અકસ્માતો થાય છે.