પશુ પંખીઓ માટે પાણી પીવાના કુંડાઓ મુકાયા : લાઈટ વગર ઝુંપડીપટ્ટીમાં રહેતા શ્રમજીવી પરિવારોની હાલત કફોડી

ઉઝા પંથકમાં ભરબપોરે આકાશમાંથી અગનગોળા વરસાવતા લોકો ત્રાહિમામ: ઠંડા પીણાંથી ગરમીમાં રાહત મેળવતા લોકો

ઉનાળો દિન પ્રતિદિન વિકરાળ સ્વરૂપ ધારણ કરી તો નવાઈ નહીં : ઉઝા પંથકમાં અસહ્ય ગરમીથી લોકો ત્રાહિમામ પોકારી ઉઠ્યા છે. દિવસે ને દિવસે ગરમીનો પારો ઉંચો જઈ રહ્યો છે. ઉનાળો દિન પ્રતિદિન વિકરાળ સ્વરૂપ ધારણ કરી રહ્યો છે. જેને લઈને સવારથી જ ગરમીનો અહેસાસ થાય છે. અને બપોર થતાં આકાશમાંથી અગનગોળા વરસાવતા હોય તેવું લાગી રહ્યું છે. જેના આગળ પંખા અને કુલર જેવા વીજ ઉપકરણો પણ ટક્કર આપી શકે તેમ નથી. બપોરે રસ્તા અને હાઈવે સુમસામ ભાસી રહ્યા છે. લોકો ભરબપોરે કામ કાજ વગર બહાર નીકળવાનું ટાળી રહ્યા છે. ગરમીમાં રાહદારીઓ માટે ઠેર-ઠેર ઠંડા મીનરલ પાણીની પરબો શરૂ કરવામાં આવી છે.

ગરમીને પહોંચી વળવા માટે લોકો ઠંડા પીણાનો સહારો લઈ રહ્યા છે. જેમાં લીંબૂ સરબત, છાશ, લસ્સી, ફુટનો રસ, શેરડીનો રસ, આઈસ્ક્રીમ જેવા ઠંડા પીણાંથી ગરમીમાં રાહત મેળવી ઠંડા થઈ રહ્યા છે. બીજી તરફ લોકો ગરમીથી બચવા મોઢે રૂમાલ, માથે ટોપી જ્યારે મહિલાઓ સ્કાફ, સમરકોટ, આંખે ગોગલ્સ પહેરીને ગરમીનો સામનો કરી રહી છે. ઉંઝા હાઈવે થી લઈને સોસાયટી આગળ શેરડી રસના કોલા જોવા મળી રહ્યા છે. ધનવાન વર્ગ ગરમીમાં રાહત મેળવવા એ.સી.નો ઉપયોગ કરી રહ્યો છે. પરંતુ લાઈટ વગર ઝુંપડીપટ્ટીમાં રહેતા શ્રમજીવી પરિવારોની હાલત કફોડી બની છે.

બીજી તરફ આ કાળઝાળ ગરમીમાં પશુ પંખીઓની હાલત દયનીય બની છે. જોકે જીવદયાપ્રેમીઓ દ્વારા પશું પંખીઓ માટે  પાણીના કુંડાઓનું ઠેર ઠેર વિતરણ કરવામાં આવી રહ્યું છે. પંખીઓ આવી ગરમીમાં રાહત મળે તે માટે જીવદયાપ્રેમી દ્વારા પાણી પીવાના કુંડાઓ મુકાયા છે. પંખીઓ માટે લોકો પોતાના ઘર આગળ, ઝાડ નીચે, ખુલ્લી જગ્યામાં, અગાસીમાં પાણીની પરબો મુકવામાં આવી છે. પશુપાલકો પશું માટે તબેલાઓમાં પંખા, કુલરની વ્યવસ્થા કરી ગરમીમાં રાહત આપી રહ્યા છે.

ડોક્ટરોની સલાહ: ડોક્ટરોની સલાહ પ્રમાણે તરસ લાગે કે ન લાગે દર અડધા કલાકે પાણી પીવું. છાશ, લીંબૂ સરબત, સરબત, તાજા ફળોનો રસ તેમજ શક્કર ટેટી, તરબૂચ જેવા ફળોનો ઉપયોગ કરવા જણાવી રહ્યા છે. તો બીજી તરફ બહારનો મસાલાવાળો ખોરાક, તળેલો ખોરાક અને બરફ વાળા પીણાનો ઉપયોગ ન કરવા સૂચના આપી રહ્યા છે. સુતરાઉ અને હલકા રંગના કપડા પહેરવા અને બહાર નીકળો ત્યારે લાંબી બાંયના કપડાં પહેરવા માટે સલાહ આપી રહ્યા છે.